Diahuebs mainta e cuerpo di docente di Colegio Aruba, conhuntamente cu presidente di SIMAR, a haci entrega di un carta oficial caminda nan ta pidi e retiro inmediato di tur e miembronan di e directiva di SVOA pa motibo di desconfiansa.
“Esaki no a cay den bon tera, nan no a acepta e carta”, meneer Everick Rincones, presidente di ALV (Algemene Leraren Vergadering) y docente di Colegio Arubano a bisa, despues cu directiva di SVOA a nenga di ricibi e carta aki na dos ocasion. “E ta lamentabel cu e directiva ta nenga di acepta un carta di su mesun trahadonan. Como bon dunado di trabou porta bo no ta di acuerdo cu e contenido di e carta pero bo por acepta e carta y kisas skirbi un carta bek cu un contesta of un reaccion”, el a bisa.
Docentenan di Colegio Aruba hunto cu señora Josephine Martilia, presidente di SIMAR, ken tambe tabata t’ey presente durante e reunionnan demostrando apoyo completo pa cu e cuerpo di docente di Colegio Arubano, a delibera y asina a tuma e decision di hiba e caso urgente aki na atencion di Prome Minister di Aruba. “Nos a dicidi di bai bek den nos seno y nos a delibera, y e docentenan a haya ta urgente y necesario pa entrega e carta directamente na Minister President Evelyn Wever-Croes pa mustra e preocupacionnan andante na Colegio Aruba”, meneer Rincones a bisa.
Señora Martilia ta sigura cu e manera cu e directiva di SVOA a rechasa e carta dos biaha y con nan a trata e trahadonan tabata un falta di respet. “No ta manera di trata hende, trata bo trahadonan, rebaha y trapa nan derecho manera cu nan no ta sirbi, paso sin e trahadonan nan tampoco no t’ey”. Señora Martilia a bisa. “Bo no mester ta eens tur biaha cu bo werkgeversnan, pero nan mester por yega cerca bo si. Pa 91 docente of trahado na Colegio Arubano pone nan nomber y firma un carta unda nan ta pidiendo bo pa bo tuma bo retiro, kiermen algo no ta bon”, el a bisa.
Den e carta aki e cuerpo di docente y trahadonan di Colegio Arubano ta splica e diferente motibonan pakico nan ta exigi e retiro di directiva SVOA, entre otro e forma dictatorial di dirigi, decisionnan unilateral cu a wordo tuma cu consecuencianan largo y e conflicto di interes di parti di e director mes di SVOA, señor Rosenstand, ya cu e ta abogado di minister di enseñansa y e tin diferente funcion dentro y pafo di SVOA tambe.
E carta aki a wordo entrega oficialmente tambe na parlamento di Aruba, na gobernador y lo wordo manda pa obispo na Corsou tambe, mirando cu SVOA ta cay bou di obispo, cu e speransa cu gobierno lo por sinta y delibera cu SVOA ya cu nan no kier sinta cu e docentenan ni reconoce nan derechonan.
