E scol secundario di havo/vwo Colegio Arubano ta bou di un supervision stricto pa su financia. Esaki como cu e situacion financiero no ta bon. Aunke cu segun informacion interno ta drechando si.
E situacion tabata asina cu no mucho tempo pasa e scol tabatin un perdida mensual di 40.000 florin pa luna. Directiva di scol a dicidi di tuma accion y asina a introduci un manager pa drecha e situacion financiero. Locual Bon Dia Aruba por compronde ta cu awor e deficit mensual a baha pa 10.000 florin. Sinembargo no ta conoci kico e efecto di e situacion financiero tin riba e scol, manera riba e enseñansa, servicio etc. Un motivacion grandi tras di e maneho actual pa drecha nan situacion financiero tambe ta cu Colegio Arubano kier drecha e scol.
Manera conoci e scol secundario no ta den un bon estado. Tin hopi mantencion atrasa pero tambe en general e scol ta bieu. Gobierno ta responsabel pa e mantencion grandi pero e scol mes mester percura pa e mantencion chikito. Pero pa hopi aña e scol no a logra pa motibo di falta di placa. Awor e scol ta buscando financiamento. Sinembargo pa motibo di e situacion financiero di e scol nan no por a haya un fiansa.
Pues pa motibo di esey ta drechando nan posicion financiero y asina por logra di fia placa pa drecha e scol. Cuanto nan mester fia pa esaki, no ta conoci.
E scol tambe tin otro retonan. Entre otro ta faltando docentenan y asina por ehempel e klasnan di examen a keda basta lunanan sin haya les di economia. Un otro reto ta cu ainda e scol no tin rector.
