Colegio Arubano a cambia exigencianan pa alumnonan di Mavo cu kier bay Havo sin aprobacion di minister di Enseñansa. Diamars e mandatario a saca un relato unda e ta notifica cu no haci niun cambio den e normanan nacional pa admision di Mavo pa Havo.

Segun e relato, Minister Michelle Hooyboer Winklaar a pidi Inspector di enseñansa pa tuma contacto cu Colegio Arubano pa asina por clarifica e informacion publica. “Despues di a consulta cu Colegio Arubano, e Inspector di Enseñansa a confirma cu en berdad e carta publica tabata contene algun informacion incorecto y esaki ta loke a causa confusion cerca e scolnan Mavo.”

“Dienst Inspectie van het Onderwijs a palabra cu rector di Colegio Arubano cu lo manda un comunicado na e decanonan di Mavo cu e informacion corecto y alabes lo manda yama un reunion pa asina clarifica e puntonan,” asina e relato tambe ta bisa.

Sinembargo a base di cartanan manda di parti di Colegio Arubano, Bon Dia Aruba ta conclui cu e scol riba su mes kier a introduci cierto cambionan sin cu nan a informa minister of haya su aprobacion. Un di e cambionan ya ta for di aña escolar pasa unda e scol secundario ta exigi cu alumnonan di Mavo mester un 8 como eindcijfer pa Wiskunda B si nan kier continua di studia esaki den Havo. Mientrastanto na Colegio San Nicolas norma a keda 7 y asina tin alumnonan cu pa motibo di esaki tabata obliga pa bay Colegio San Nicolas en bes Colegio Arubano.

 Alumnonan ya a scoge caba
Manera Bon Dia Aruba a skirbi caba no tin uniformidad entre e scolnan Colegio San Nicolas y Colegio Arubano aunke cu e minister ta splica cu e normanan ta normanan nacional cu a wordo aproba na mei ultimo. Por ehempel Colegio Arubano a limita escogencianan di cierto vaknan den e diferente pakete. Manera alumnonan no mag di scoge Wiskunde B den un profiel di MM pasobra segun nan investigacion, no tin estudionan despues cu ta rekeri Wiskunde B hunto cu e profiel di pakete MM. Sinembargo na Universidad di Aruba tin e opleiding pa docente Wiskunde unda ta pidi solamente un diploma di havo cu Wiskunde. Bon Dia Aruba a tende di alumnonan, ta uno cu nan ta prefera e  MM-profiel pasobra e otro profiel NW ta uno cu tin demasiado vaknan exacto cual hopi biaha ta dificil pa nan.

Un otro cambio cu ta limita nan escogencianan, segun e alumnonan cu Bon Dia Aruba a entrevista den cuadro di un accion cu nan a haci contra e cambionan di Colegio Arubano, ta trata di 8e vak. Colegio Arubano ta bisa den e carta manda pa mentornan di scolnan di Mavo, cu nan no ta duna e oportunidad mas pa alumnonan di Havo. Sinembargo tin alumnonan cu kier un 8e vak pasobra nan kier bay VWO despues di Havo. Aunke Colegio ta bisa cu nan lo ofrece esaki despues cu nan a haal Havo, e alumnonan ta bisa cu asina e ta hopi dificil pa bay VWO como cu nan tin un retraso grandi ora di drenta VWO sin cu nan a haya les den e 8e vak.

Finalmente locual ta preocupa e alumnonan tambe ta cu ya nan a scoge nan pakete caba. Diamars tabata e fecha final pa entrega nan escogencianan pa Colegio Arubano. Awor cu minister ta indica cu Colegio Arubano no a informa e scolnan di Mavo corecto, nan pregunta ta kico awor y si ainda nan por cambia nan escogencianan.

Bon Dia Aruba ta keda pendiente riba un comentario di banda di Colegio Arubano riba e asunto aki.