Autoridadnan di bida salvahe a comparti potret di un colebra cu tres wowo, cu a ser haya riba un caretera na nort di Australia.
Servicio di Parke y Bida Salvahe di Teritorio Nort a describi e descubrimento, cual a ser comparti online, como ‘peculiar’. Ricibiendo e apodo di Monty Python, e carpet python baby a fayece apenas algun siman despues cu el a wordo haya na maart.
Expertonan ta bisa cu e di tres wowo di e colebra, riba su cabes, ta parce di ta un mutaciona natural. Rangernan a descubri e cerca di e pueblo di Humpty Doo, 40km leu di e sur- oost di Darwin.
E reptil, 40cm largo, tabata lucha pa come pa motibo di su deformidad, oficialnan a bisa BBC.
‘Caso natural’
E servicio di bida salvahe a bisa cu scan di x-ray a mustra cu e colebra no tabatin dos cabes forma hunto. “Na luga di esey, ta parce di ta un craneo cu un apertura extra pa wowo, y tres wowo cu ta funciona”, a bisa riba Facebook.
Experto di colebra, profesor Bryan Fry, a bisa cu mutacion ta un parti natural di evolucion.
“Tur baby tin un mutacion di algun forma – esaki ta djis particularmente mal forma”, Fry a bisa for di Universidad di Queensland. “Mi no a mira un colebra cu tres wowo antes, pero nos tin un carpet python cu dos cabes den nos laboratorio – ta djis un otro forma di mutacion, manera nos ta mira cu morocho Siames.”
El a sugeri cu e tercer wowo di e colebra por ta ‘e ultimo pida di un morocho cu a ser absorbi’.
