Riba 29 di october e cuater organisacionnan di salud mental di tur 6 isla den e parti Caribense di Reino a firma un acuerdo di colaboracion pa mehora e calidad di cuido di salud mental pa comunidad Caribense. Ta trata di e fundacionnan Respaldo, GGZ Curaçao, Mental Health Foundation Sint Maarten y Mental Health Caribbean na Boneiro, Saba y Statia.
Principalmente COVID a causa cu e presion riba cuido di salud mental rond mundo a aumenta. Pa e motibo aki e organisacionnan riba tur isla ta experencia lista largo di espera, escasez di capacidad, presion financiero y situacion cu ta empeora cerca clientenan. Pa forma un bos den Salud Mental pa tur isla e organisacionnan ta para mas fuerte hunto. E colaboracion lo realisa intercambio di conocemento y experticio organisatorio na bienestar di calidad di cuido riba tur isla.
Cu e firmamento aki lo sigui intensifica e colaboracion existente riba diferente area. E organisacionnan lo uni forsa principalmente riba tereno di calidad, ley y estudio. Pensa aki riba crea cursonan p’asina pone mas oportunidad di estudio (por ehempel pa enfermero psikiatrico) disponibel den region y por mantene talento na cas. Tambe por haci uzo optimal di e desaroyonan tecnologico den region manera E-health pa duna sosten na cuido.
“Manera Dutch Caribbean Hospital Alliance (cooperacion entre e hospitalnan di e 6 islanan) por medio di e colaboracion tin como meta pa mehora e cuido somatico den e parti Caribense di Reino, nos tambe lo traha duro pa mehora e calidad di cuido di salud mental. Den esaki nos lo inicia cu gruponan di trabou concreto riba tereno di calidad, ley y formacion. E empleadonan di tur organisacion ta representa den e gruponan di trabou.” segun Erik Jansen director-gerente di Mental Health Caribbean. “Meta ta pa haci miho uzo di e experticio y facilidadnan di otro. Como organisacion nos no ta ekipa pa ofrece tur scala di tratamento. E colaboracion mester por haci esaki mas facil y eficiente.”
E director y gerente di e organisacionnan aki a bini hunto diabierna merdia na Aruba den e Aula di Universidad di Aruba pa firma e acuerdo. Minister di Husticia y Asuntonan Social di Aruba Sr. Rocco Tjon, ken recientemente tin e cuido di salud mental den su cartera, a habri e merdia cu un discurso tocante e importancia di nos salud mental y colaboracion entre e islanan.
