Cu e meta di haya sa cuanto actividad economico Aruba tin, 14 di april ultimo Central Bureau of Statistics Aruba (CBS) a tene un conferencia di prensa pa informa cu hasta fin di juni encuestadonan mester a bay bishita diferente compania pa haya datonan relaciona cu nan actividad economico, pero esaki a haya algun inconveniente na caminda.
Jonathan Upegui, ken ta fungi como hefe di departamento di National Accounts di CBS, a splica cu den e retonan mas grandi cu nan ta bin enfrentando pa por culmina cu e encuesta aki tabata e falta di colaboracion di negoshinan, na unda tabatin varios negoshi cu tabata haci un tiki dificil pa coopera cu esaki.
Entre e motibonan di esaki, el a menciona cu doñonan di negoshi tabata bisa cu nan no tin tempo, cu nan no ta mira e importancia di esaki y ademas nan tabata para riba e hecho cu no ta obligatorio pa nan.
“E Censo Economico a cera fin di augustus di e aña aki. Loke falta awo ta algun compania cu a keda di duna nos cierto informacion ainda. Pero ya nan ta wordo considera como conta caba.
Nos a pasa riba tur e lista inicial cu nos a cuminsa cune y a bishita tur negoshi riba e lista y tambe negoshinan cu no tabata aparece riba e lista (posibel negoshi nobo).” Upegui a señala.
Ademas el a menciona cu “nos tin hopi compania cu a coopera, cual nos ta sumamente agradecido pa esaki pero nos tin tambe un grupo cu sea a nenga of nunca tabata disponibel pa haci e censo. Un ehempel di esaki ta negoshinan cu continuamente tabata cambia e fecha pa haci e censo. E ora ey tecnicamente nan no a nenga pero tampoco nan no a coopera. E ora ey nan ta cay den e categoria cu nunca tabata disponibel.” El a informa.
Den esaki, el a sigura cu nan a purba di varios manera cu e grupo aki pa bolbe yama nan y duna nan opcion pa haci e censo via telefon, via e-mail of traha un link digital pa nan yena esaki. Y por bisa cu nan tabata tin success pa toch convence e grupo cu a nenga/ no disponibel pa coopera.
Jauregui a bisa cu na e momentonan aki nan ta den e proceso pa verifica cuanto compania a contesta e censo por completo. Esey ta inclui e grupo cu na prome instante no kier a coopera. E proceso aki por tarda pasobra cada un negoshi ta haya un link individual pa nan. Pero si en caso nan a nenga na prome instante y despues a haci e censo e ora ta posibel cu nan a yena esaki den un link nobo. Dus tin cu haci e matching aki.
“Despues nos ta bay over den procesa e data y pa despues traha estadisticonan. Ora nos traha esaki nan nos ta bay analisa nan prome internamente pa despues duna e resultadonan. Dus e ta un proceso largo toch pa yega di haci e entrevista, pa procesa e data y pa publica e resultadonan”, Upegui a menciona.
Pa loke ta trata e preguntanan, nan a puntra e entidadnan pa datonan relaciona na empleo manera, cantidad di empleadonan, suma total di salario paga y vacaturanan disponibel. Tambe a bay puntra nan tocante digitalisacion (si ta haci propaganda y/ of bende productonan via website of social media). Entidadnan den e sector di agricultura, pesca y cria a haya preguntanan extra mirando e importancia duna na e sector aki.
Cu e datonan obteni, e departamento di National Accounts di CBS por cumpli tambe cu standardnan internacional di National Accounts cual ta bay actualisa den e manual nobo “SNA 2025” di United Nations. E encuesta aki ta di importancia tambe pa por compila e “Supply and Use Table (SUT)” nobo pa asina por keda calcula e GDP na e forma mas adecua y actualisa. Banda di e metanan aki, e Censo Economico ta haci posibel pa CBS raporta datonan economico na organisacionnan internacional (manera World Bank y United Nations), segun e standardnan rekeri internacionalmente.
Di esaki, el a sigura cu ta bay tuma un aña of mas pa saca tur e resultado y actualisa e manual. Den caso aki nan ta midi tur negoshi cu ta visibel segun el a sigura, sea si tin un empleado of mil empleado ta traha na dje, “tin esnan cu ta online y nos tin algun luna caba ta haciendo un investigacion riba medionan social online pa wak si nos ta haya algun negoshi cu nan adres cu no ta aparece den nos lista y nan ta agreg’e.”
Tambe Upegui a menciona cu na october y november di aña pasa nan a pasa full Aruba pa wak cuanto negoshi tin. Den total, e lista a sali cu un tiki menos cu 6.000 negoshi cu encuestadonan ta bay bishita, pero for di november te cu awor, tin posibilidad cu negoshinan nobo a habri, cera of muda y den e casonan ey e lista por ta mas grandi.
Nan a solicita na cada empresa of instancia nan cooperacion pa e entrevistado, pero manera el a menciona esey tabata e reto di mas grandi unda nan tambe a bisa na doñonan di negoshi cu CBS ta traha basa den confidencialidad y cu esey ta parti di nan legislacion unda nan no por comparti e data cu nan ta ricibi cu otro autoridad. Esaki ta utilisa solamente pa traha estadistica.
Pa loke tabata trata e sector primario, Santa Rosa tambe a participa y a bishita algun persona den area aki nan pa puntr’e tocante nan tereno, grandura, pakico e ta bay ser usa, si ta pa cria of pa agricultura, pa asina ey nan por tin un bista mas amplio di loke sector primario ta.
