‘Colaboracion cu Wageningen por beneficia Aruba’

Recientemente durante e reunionnan di IPKO, e parlamentarionan di Aruba a realisa un bishita na Universidad di Wageningen. Miembronan di e delegacion a wordo ofreci un lunch organico di productonan cultiva eynan.

E delegacion a bishita un broeikast, caminda a wordo splica con ta haciendo investigacion riba cierto condicion pa cultiva por ehempel mata di banana, pero tambe diferente otro matanan cu ta produci berdura y fruta.

“Locual tabata hopi interesante ta cu nan ta dispuesto pa traha cu nos y a splica tocante diferente forma di colaboracion, manera summerschool na Universidad di Aruba, of tayernan por ehempel pa diferente departamento di gobierno por crea e conocemento adicional pa sa kico ta posibel y ki tecnologia y avancenan significativo tin den e area di siguridad di cuminda”, parlamentario Lejuez ta bisa. “Nan lo por bin Aruba pa un par di luna, colabora cu Universidad di Aruba por ehempel, mirando cu Universidad di Wageningen tin basta experticio riba diferente nivel manera salubridad, cria y pesca, medio ambiente, innovacion y hopi mas.”

Durante di e bishita ta aki nan a haya varios presentacion di estudionan y proyectonan cu nan ta haci incluyendo restauracion di coral reef nan. “Nos a wak un live lab cu coral bibo, unda nan ta haci estudionan riba nan reaccion bou diferente condicion pa asina por compronde e efectonan di cambio di clima riba nan. Nos a haya tambe un presentacion chikito riba estudionan cu nan ta haciendo riba cultivo di pisca.” Nan a bishita un departamento di Alga, y tambe a haya informacion di e progreso di e Alga Parc na Boneiro cu ta den proceso.

E parlamentario a conclui cu e ta kere tin diferente caminda cu Universidad di Wageningen ‘lo por yuda nos’, aparentemente den e parti turistico tambe. E parlamentario ta expresa cu Aruba ‘por beneficia di nos lasonan cu Reino pa por logra tin e conocemento na nos alcance’, y por intercambia y comparti informacion y/of haci investigacion na Aruba.

Tur esaki lo por hiba no solamente na mas conocemento, pero tambe lo por yuda Aruba riba varios otro aspecto social, economico, alimenticio y tambe turistico. Parlamentario Lejuez ta bisa cu ‘e lo sigui y sinta cu e diferente instancianan pa wak nan feedback riba esaki y kisas como sugerencia manda esaki pa cada minister envolvi den e departamento aki’.