(NLTimes) – E plataforma di intercambio di criptomoneda Mericano Coinbase oficialmente a registra cu Banco Central Hulandes (DNB). Desde aña 2020, companianan cu ta provee servicionan di criptomoneda na Hulanda ta obliga di ta registra cu e banco central.
Coinbase a yama su mes e prome hungado internacional grandi den e indsutria di criptomoneda cu a completa e proceso di registracion Hulandes.
DNB a introduci e obligacion pa registra pa companianan di criptomoneda como un manera di combati labamento di placa y e uso di criptomoneda pa financia terorismo. Ora di aplica, e companianan mester por demostra cu nan ta cumpli cu e legislacion tocante sancion y anti-labamento di placa.
Companianan ta core riesgo di haya boet si nan ta provee servicio na Hulanda pa cu criptomoneda manera bitcoin, Ethereum of Tether, prome cu nan registra. Por ehempel, Binance, e intercambio di criptomoneda mas grandi mundialmente, a ricibi un boet di 3.3 miyon euro anteriormente pa motibo cu nan tabata activo na Hulanda sin cu nan a completa e registracion obligatorio.
E hecho cu Coinbase a registra cu DNB no ta nifica cu e plataforma ta ser revisa pa stabilidad financiero of riesgonan. Netherlands Authority for the Financial MArkets tampoco lo supervisa Coinbase. E compania Mericano ta enfatisa cu consumidornan no lo ricibi proteccionnan specifico ora ta trata di perdida den e industria di criptomoneda.
