COHO un realidad… Y nos ta sigui coho…?

Cu e anuncio cu tin porfin un acuerdo entre e paisnan den Reino tocante e proyecto di ley pa constitui e organismo di reforma y desaroyo di e tres islanan, awor e trabao por cuminza. En realidad, a cuminza cu cierto preparacion hayando forma caba. Manera den enseñanza unda e equipo conhunto di Aruba y Hulanda a entrega un rapport recientemente cu no ta contene sorpresa pero si ta pone tur e problematica compleho riba mesa. Tambe riba otro tereno manera finanzas publico ta cuminza mira e contornonan di loke mester bira e reforma fiscal cu mester beneficia tanto gobernacion como nos economia. Pero primeramente algun atencion pa e ley mes.

Punto cardinal, enfatisa den e ley mes tambe, ta cu e organismo lo ta un entidad Hulandes, institui y financia enteramente pa Hulanda. Esey tin cierto logica pasobra Reino riba su mes no tin personeria huridico, no tin propiedad ni personal. Pais Hulanda anto ta carga tur gasto y responsabilidad. E organismo COHO no ta usurpa autoridad di ningun entidad riba e islanan, y ta opera puramente a base di e plannan acorda conhuntamente y den esey ta hiba e supervision riba ehecucion di esakinan, na nomber nos por bisa di e financista di e desaroyo planifica, gobierno Hulandes. Di e manera aki esunnan cu ta keda responsable pa ehecucion di cualkier plan, ta e gobierno di e respectivo islanan mes. Esey ta corecto tambe, den e sentido cu bo no por ni mester imagina cu nos ta bay haya henter un desaroyo dicta y supervisa pa Hulanda, mientras algun dia e islanan lo mester ta capaz di asumi e responsabilidad ey nan mes atrobe. Pa nos cay den mesun problemanan di inmadurez politico y administrativo cu nos a experimenta den ultimo tres decada y mey?

E respet pa autonomia, cu ta haya concretizacion den e proyecto di ley aki, no ta cambia naturalmente cu e asunto ta keda un condicionamento di e ayudo cu Hulanda ta brinda e islanan, den un crisis economico y financiero profundo, di cual ta dificil pa nan sali nan mes, y fortifica, mihor prepara pa un siguiente crisis. Y no mester lubida tampoco cu e supervision aki ta bay acompaña pa un supervision financiero cu tin seis aña presente caba y cu ta bay keda durante henter e periodo aki di seis aña, cu posibilidad, pa COHO en todo caso, pa prolonga o reduci e periodo aki, segun e avance di esaki. Por bisa anto cu e acuerdo aki ta conta tambe pa e siguiente gobierno, cualkier cu lo ocupa e puesto despues di 2025.

Cu e cuadro legal institui pa e reforma, y e recursonan financiero sigura, ta kico mas falta anto? E factor principal: e voluntad berdadero y genuino pa reforma y mehora nos comunidad y economia… Aki un luna nos ta cumpli dos aña cu e crisis actual a cuminza, y nos ta bay cumpli talvez casi un aña mas pa yega na e momento cu e organismo COHO por cuminza opera cu su fundamento legal na su lugar. Loke nos a mira te awor di banda di gobierno di Aruba na ningun momento ta mustra cu nan mes ta convenci di e necesidad di tur esaki, y cu nan al contrario lo tin gana di simplemente resolve e problema financiero…, y sigui biba ‘happily ever after’. Pero esey no ta posible. E ayudo y condicionnan Hulandes ta un realidad. Pero djis pa argumenta, ban pone e presencia Hulandes un banda. Nos ta un isla Caribense cu a hinca su mes den problema, permitiendo tur gobierno fia placa, un (hopi) mas cu otro, te cu no tabata por mas. Despues a bin Covid-19 y nos ta unda nos ta awor. Wel, en realidad no, pasobra unda lo nos a fia e alrededor di 1000 miyon florin cu nos a haya fia na Hulanda, sin interes? Gobierno, den e situacion imaginario ey, lo no a corta 12.6%, sino 50% of mester a opta pa laga mitar di e 8.000 salarionan bay cas man bashi… Esey no lo tabata un bon base pa gana e siguiente eleccion tampoco, toch? Ta e ayudo Hulandes a mantene e actual gobierno den Bestuurskantoor, nada otro.

E problema cu keto bay nos tin nos dilanti, ayudo Hulandes of no, ta cu si nos no ta cuminza drecha cos den e performance pesimo di gobernacion di Aruba, e ta keda persigui y obstaculiza nos den nos desaroyo economico, y social. Si no tabatin presion Hulandes awor, lo tabatin presion di e realidad socio-economico manera cu e ta, y ta obliga nos drecha cos, o sufri e consecuencianan a largo plazo. Y esey no ta tur tampoco. Drecha gobernacion no ta drecha economia di mes, pa esey mester mas. Manera un plan a largo plazo, di por lo menos 10 aña, cu ta indica unda nos ta bay y con nos ta yega ey. Manera cos ta awor, e unico ‘plan’ economico cu Aruba tin ta permiti construccion di mas tanto camber di hotel y condominium posible. Nos ta realiza cu talvez e promer hotel cu lo bay bancarota ta construi, o ta bao construccion, caba? Nos por a pidi e Hulandesnan entrega un plan pa esey tambe, o por ta cu esey ‘nos mes por’…? Of nos ta sigui coho, a pesar di COHO?