Coby Geerman Sindicato UEA: Mañan ta haya sa si empleadonan ta wordo paga

Den un entrevista cu Coby Geerman di sindicato Union Electricista Arubano (UEA) a puntr’e con ta para cu e empleadonan di Elmar cu a bay den accion pa 8 ora. El a bisa cu hues lo duna veredicto mañan 10’or di mainta den e caso aki. Aparentemente tin desacuerdo entre e gerente y empleadonan pa si nan tin derecho di wordo paga pa e oranan cu nan a bay den accion of no. Tur hende ta keda traha pendiente e veredicto.

“Normalmente ta dilanti di corte ta caminda cu nan ta gaña mas cu nunca, y esaki a wordo demostra un biaha mas.” Sr. Geerman a cuminsa bisa. “Prome cos, nos abogado a mustra hues cu e ta contra con cos a bay pa loke ta un sentencia duna (corte sumario) diamars 10or y mey anochi sin nos abogado presente, y sin cu ta na altura (falta di etica), pero hues no a bisa nada al respecto di esaki.”

Companianan grandi tin generator

Di parti di Elmar e abogado a trece tur biaha mesun storia, bienestar di e pais y pa hues manda nos bay traha, cu boet di 25 mil florin pa dia of parti di un dia cu no bay traha te na un suma maximo di 1 miyon florin, segun Sr. Geerman. “E motibo cu nan a duna di esaki ta, como cu si nos no bay traha y coriente bay, diferente instancia ta keda sin coriente manera polis, aeropuerto, setar, brandweer, hospital etc. Imagina bo cu hues mes a contesta cu aworaki ta den tempo unda cu tur e luganan ey tin generator grandi automatico pues no tin problema cu coriente.”

CAO

“Ademas hues a puntra pa un CAO y nos a dune esaki, den e CAO (nos ley), tin poni cu ki ora tin un welga, e gerencia por haci apelacion na nos pa soluciona esaki y nos mes ta percura pa manda hende pa haci e trabou.” Kiermen no tin nada cu por tuma luga  cu ta bisa un por manda hende, pasobra esaki ta e acuerdo.

Ta bunita pa nan bisa cu nan tin pueblo na curason entre otro, pero no ta berdad. Dia cu Elmar a bisa cu ta baha tarifa di coriente, nos tabata contra. Nos tabata kier pa e baha cu 20% y no 10%, pero mester a dal bay pasobra ta nan ta dicidi den Elmar. Despues di sinta na mesa na december a puntra ki di nobo lo tin e aña aki nan a bisa nada nobo y mester warda januari. Su dia siguiente ta habri corant y lesa cu coriente a baha. A puntra Sr. Geerman dicon e mester baha cu 20%, el a splica cu ora bo ta bay presta di un banco bo tin cu paga porciento. “Aki  ta fia placa y pueblo ta paga 15%, nunca un trahado den historia a haya e porcentahe ey, y aki nan a haci’e directo cu tur hende, nan un tene cuenta cu si ta cobra onderstand of no.” Awor aki ta pendiente e sentencia di diaranson pa mira kico ta pasa.

Situacion anterior

Tabata diamars 16 di februari cu empleadonan di Elmar a bay den accion pa 8ora largo. Como motibo principal algun cambio cu a bin den procedura di siguridad cual no a wordo comunica cu e empleadonan prome cu e empleadonan a bay den accion, ya nan a manda un e-mail pa esunnan encarga cu e maneho pero no a ricibi contesta. E intencion tabata pa nan bay den accion e siguiente dia tambe, esaki a tuma luga pero despues di un rato pafo tur empleado a wordo manda paden bou ordo di hues despues di e veredicto duna diabierna, reaccion di Abogado cu ta representa Elmar Lincoln Gomez, unda cu e ta enfatisa cu gerencia a aplica e proceso di no work no pay pa e 8 oranan cu e empleadonan no a traha, y cu esaki ta keda na vigor te ora cu hues dicta sentencia diaranson.