Manera Bon Dia Aruba a publica den su edicion di ayera, diaranson ultimo Departamento di Impuesto a tene un conferencia di prensa pa informa comunidad di diferente topico, manera cobransa di grondbelasting cu ta cuminsa na final di mei, formulario di inkomstenbelasting di 2022 y e cantidad grandi di bezwaar pendiente.

Cobransa di Grondbelasting ta sali 31 di mei 2024

Director di e departamento, Luenne Gomez-Pieters a splica cu contribuyentenan mester keda atento riba e productie kalender, caminda e cobransa di grondbelasting ta bay sali na fin di luna di mei, specificamente 31 di mei 2024. Esaki ta un cobransa cu ta sali tur aña, unda tur contribuyente cu ta doño di un propiedad inmobil lo haya un cobransa di grondbelasting.

“Nos ta recorda cu tin un meldingsplicht den e ley poni desde 2019, caminda cu lo mester registra un propiedad na Departamento di Impuesto, y riba nos website tin un formulario digital specialmente pa registra bo propiedad y tambe registra e cambionan den e propiedad. Por ehemplo, si mi tin un cas y m’a dicidi di pone un pool, e tin un balor agrega pasobra e propiedad ta subi di balor y pa nos por asesora esaki, ta importante pa bo melding,” el a bisa.

Den e grondbelasting tin tarifanan asigna pa cada balor di propiedad, esey ta nifica cu tin escala di tarifa y mientras e propiedad ta subi di balor, e impuesto tambe ta subi.

E prome dos termino di pago ta vence 30 di juni 2024, loke ta nifica cu mester paga 50% di e suma. E di tres termino di pago ta dia 30 di september 2024, unda ta pidi 25% di e suma y e di cuater termino di pago ta 3 di januari 2025 cu 25% di e suma total.

19.176 formulario di inkomstenbelasting di aña 2022 procesa caba

Gomez-Pieters a sigura cu kier a duna un update di aña 2022 caminda nan a paga un total di 26.6 miyon florin aña pasa na restitucion di impuesto. Te cu prome kwartaal di 2024, e departamento aki a procesa y paga 4.6 miyon florin na restitucion, y nan a haya en total 43.028 formulario. Ademas nan a haya 27.828 formulario back, kiermen mita di loke nan a saca nan a haya back, loke ta nifica cu esaki ta trata un “red flag” na momento di papia di compliance, segun el a expresa.

Di esakinan, a procesa 19.176 formulario caba y a paga e restitucion. Ta falta 8.652 formulario di aña 2022 pa nan por procesa, y e director a señala cu nan lo keda cu esaki prome cu e siguiente formulario sali y tur contribuyente lo haya tambe e restitucion cu ta nan derecho.

E formulario di 2023 lo sali dia 9 di augustus. E prome fecha final pa entrega formulario di inkomstenbelasting ta 9 di october y esnan cu no haya chens di entrega e dia aki lo haya un extension automatico pa 9 di december 2024.

“Manera cu e formularionan drenta nos ta cuminsa procesa nan y paga e restitucion. Tur contribuyente por ta trankil cu nos tin un sistema di FIFO, “First In, First Out”, kiermen bo entrega bo formulario mas trempan, mas trempan bo ta haya bo restitucion tambe procesa door di Departamento di Impuesto,” el a bisa.

Cantidad grandi di bezwaar pa procesa

Pa loke ta trata e topico di bezwaar, director Gomez-Pieters a sigura cu tin contribuyentenan cu ta pendiente, unda nan a atende cu diferente factor cu tin efecto riba e contribuyente tambe y un di nan tin nan atencion, cu ta bezwaar, cu nan ta atende masalmente.

Te cu maart 2024 nan tin un cantidad grandi di bezwaar, 42.227 ta di BBO, 37.500 di loonbelasting, y 12.152 bezwaar di inkomstenbelasting. “Nos ta focus riba e tres aki pasobra esakinan ta e sumanan di mas grandi di bezwaar cu nos tin,” el a sigura.

Te cu aña 2023, nan a atende cu 40.935 bezwaar y te cu e prome kwartaal di e aña aki, nan a atende 18.732 bezwaar. “Mi ta sumamente contento con e funcionarionan publico a compronde e concepto di e proyecto aki. Ta trahando hunto cu nos ekipo di profesional, caminda nos a duna extra capacitacion pa nan compronde e tecnica di loonbelasting, di BBO, inkomstenbelasting, con nos sistema ta atende cu e procesamento di bezwaar y nan ta bayendo den un speed cu mi ta kere cu den dos aña of un aña y mey nos lo tin e cantidad grandi di bezwaar bao di control,” Gomez-Pieters a señala.

E bezwaarschrift cu ta drenta digital, cu ta posibel for di aña pasa, nan personal ta atendiendo cu esun di 2023, 2024 y tur esnan cu tin un retraso den dje. “Si tin feedback di contribuyentenan cu por bisa cu algo no ta bayendo bon den e trayecto di bezwaar, por tuma contact cu nos. Nos ta habri pa cualkier feedback cu ta constructivo pa nos por bira miho y nos por sirbi nos contribuyentenan. Nan mester tin siguransa di kico e tin cu paga, na ki momento y nan tin derecho pa entrega bezwaar y nos tin un obligacion pa atende cu esaki tambe den termino cortico.”

Ademas, el a informa cu awor nan tin un call center di 7 hende, caminda nan ta atende cu un sistema mas moderno, segun Gomez-Pieters a expresa, y tin diferente opcion pa scoge un servicio cu nan ta brinda. “Nos ta purba di structura e yamada, pasobra si nos ta haya miles di yamada riba un dia, e 7 persona aki no ta bay ta suficiente. P’esey nos ta purba structura, nos tin un reunion pendiente cu e persona cu ta lidera esaki cerca nos y esnan cu a implementa e sistema pa nos haya datonan y asina mi por comparti cu boso cuanto yamada a drenta,” Gomez-Pieters a declara.

Pero ainda nan no ta na standard cu nan kier yega, e servicio na cliente mester mehora unda nan ta haya diferente comentario di adulto mayor, por ehemplo, cu ta indica cu nan no kier yama via telefon sino cu nan kier papia personalmente cu un hende y pa nan e departamento ta buscando e manera con por ubica e personanan aki pa nan tin un otro approach pa servicio na cliente.