Hues Verheijen, despues di considera e exigencia di fiscal di 10 aña di prizon pa trafica 20 persona – cu consecuencia cu 2 persona a fayece – a haya cu e straf lo ta mucho halto y a dicta cu e straf lo ta 2 aña pa tur 3 persona cu a comete e echo.
Hues, motivando su decision pa rebaha e castigo di prizon di 10 aña cu Fiscal a pidi pa 2 aña, a bisa cu el a basa su decision riba e echo cu e 2 persona cu a hoga no a hoga directamente pa via di accionnan cometi pa e traficantenan. Nan a nabega di La Villa na Coro, Venezuela den october di 2018.
Straf di 1 aña condicional pa un di e complicenan
Tur tres traficante, kendenan a colecta en total 600 dollar pa trafica mas o menos 20 Venezolano di cual 2 a hoga, a haya un straf di 2 aña (48 luna). Sinembargo pa un di e personanan cu tabata complice den e acto aki, Hues a dicidi di baha e straf pa 1 aña, haciendo e otro aña condicional solamente den caso cu e no comete un echo castigabel durante un temporada di 3 aña.
Hues: Traficantenan no a mata directamente
Fiscal den su rekisitorio a pidi 10 aña mirando cu pa via di accionnan di e complicenan dos persona a hoga. Sinembargo hues a bisa cu e traficantenan no a actua cu intencion di causa morto, si no cu pa via cu nan no a tene den consideracion e siguridad di un embarcacion normal manera suministra salbabida y tin un sistema di nabegacion, ademas cu a pone persona den peliger por medio di pak e boto chikito, tipo peñero, mucho yen.
