ORANJESTAD – Manera a bira conoci algun dia pasa, e compania y contratistanan di cobamento di santo y kibramento di piedra a mustra preocupacion pa motibo cu hopi di nan no tabatin permiso pa haci e trabou ey na diferente luga, ya cu esey no ta cuadra cu proteccion di naturalesa y medio ambiente.
Bon Dia Aruba a acerca e zona di Barcadera, y a haya dos situacion, cual un di nan ta trata di cobamento di santo. Na e luga a haya un meneer cu tabata haci e trabou di controla ken ta sali y ken ta drenta na e luga. A puntra e meneer algun pregunta: di kico ta trata e cobamento aki? Nan tin permiso pa haci esey? Ken ta e persona responsabel di e trabou cu nan ta haci den e tereno aki, cu manera e lectornan por aprecia na e potret, ta causando hopi daño ambiental precisamente banda di lama?
E meneer, cu no a duna su nomber y tampoco a ofrece un informacion precies, a relata cu e responsabel di e trabounan ta un meneer di fam Portugues, pero e no sa su nomber y tampoco sa si nan tin un permiso pa traha eynan.
E otro situacion cu a mira na otro banda, ta un tereno cu a rosa caba, limpi pero tin un borchi cu ta bisa cu no mag di drenta. Den e luga tabatin hopi saco blanco, cu ta parce cu ta forma parti di e proximo labor cu lo bay haci na e luga ey.
Bon Dia Aruba a tuma contacto cu Directie Infrastructuur en Planning (DIP) pa haya informacion tocante e dos caso aki, y a presenta e preguntanan en cuestion, pero te e momento di publicacion di e nota aki, no tabatin contesta inmediato.
