Ayera dia 3 di october pa 1or di merdia un delegacion di partido AVP, consistiendo di Benny Sevinger, Mike de Meza y Arthur Dowers a reuni cu informador Arie Swaen, riba e proceso pa forma un Gobierno nobo.

Na e ocasion aki, e delegacion di AVP a contesta un cantidad di pregunta cu informador a haci na nan. For di e reunion akinan e delegacion di AVP a conclui cu informador su tarea ta pa forma un Gobierno MEP, POR y posiblemente incluyendo RED. Un Gobierno di MEP- POR – RED  ta locual e partidonan en cuestion ta considera como un Gobierno di base amplio. Mientras cu exclusion di RED lo ta un Gobierno cu un mayoria preta.

E delegacion di AVP a trece un cantidad grandi di informacion na informador cual no por wordo divulga publicamente. E mensahe di e delegacion na informador ta, cu un Gobierno di MEP y POR lo ta uno sumamente instabil y cu lo conduci na hopi intrankilidad aki na Aruba y den Reino pa motibo di e forma cu nan kier goberna y pa motibo di nan prioridadnan.

Fuera di esaki e delegacion di AVP a indica di nunca partido AVP lo core pa asumi responsabilidad gubernamental si esaki ta pa sirbi interes general di Aruba. Den caso di un gobernacion cu AVP e prioridadnan cu AVP a presenta den eleccion lo mester forma parti di un acuerdo di gobernacion. Esaki kiermen cu no lo por bay castiga comunidad cu medidanan bou capa di rapportnan internacional, manera cu MEP y POR ya a indica di kier bay haci.

Pa ilustra e compromiso di AVP pa ehecuta e programa cu a bay eleccion cun’e, e delegacion a duna informador copia di e plan di partido AVP padilanti:

E plan aki ta contene e puntonan cu lo mester inclui den un acuerdo di gobernacion, manera e asistencia na esunnan di menos recurso, e introduccion di un huurtoeslag pa e grupo cu no tin un cas, e construccion di 2000 cas, e ampliacion di e grupo cu ta ricibi gehandicaptenuitkering cu esunnan menor di edad, aumento di e suma cu e grupo aki ta ricibi cu 50%, mehoracion di e condicionnan di infrastructura y condicionnan social den tur bario pa mehora calidad di bida di nos ciudadanonan den tur bario di Aruba, continuacion di e agenda pa haci Aruba independiente di energia fosil, continuacion cu e diversificacion di nos economia y creacion di cuponan di trabou nobo cu entre otro e operacionalisacion di e refineria, realisacion di e plan pa explora gas, creacion di sectornan economico nobo, pone mas polis riba caya pa sigui reduci criminalidad, fomenta relacionnan fuerte den Reino, Union Europeo y cu nos partnernan social aki na Aruba mes.

Esakinan ta algun ehempel di e prioridadnan cu partido AVP a pone pa e siguiente gobernacion. Ta e programa di AVP cu e puntonan aki a ricibi mas voto y sosten di comunidad den e ultimo eleccion. Mirando e mayoria marginal cu e gobierno MEP-POR lo tin, e falta total di legitimidad den voto di e lidernan di MEP y POR, e falta di un meta comun otro cu simplemente poder, ta haci cu e gobierno aki lo no tin e autoridad moral y politico necesario den comunidad pa por goberna cu efectividad.

Esaki unicamente lo bira peor mirando e intencion di e gobierno MEP-POR pa bay impone medida riba pueblo bou e pretexto di rapportnan internacional. AVP lo no acepta esaki ni un dia y a informa Informador di esaki tambe. E gobierno di MEP-POR lo ta uno di instabilidad y intrankilidad pa Aruba.