Coalicion a cuminsa… Sinti urgencia pa actua…?

Banda di e monotonia y rutina di e ruedanan di prensa tocante e crisis di coronavirus a surgi algo interesante. Mientras no tabata tende mucho di e otro asuntonan cu mester tin e atencion di nos tur, principalmente e negociacion y terminacion di e plannan pa rescate – mas tanto posible – di empleo den sector priva y di e empresanan tambe – awor ta surgi un plan di accion di partido di coalicion POR, cu den e documento extenso ta aparece cu loke ta mustra manera un ‘blueprint’ completo pa e resto di aña y hasta despues.

Ta naturalmente necesario pa studia esaki y evalua cada punto segun nan merito, loke nos ta recomenda tur hende haci tambe. Di otro banda, ora nos ta den un situacion di emergencia, y nos a cuminsa haya e promer señalnan caba di un cierto iritacion pa e lentitud den tuma accion y comunica esaki cu comunidad, pa e puntonan cu no ta toca e crisis di salud publico mes, es decir e consecuencianan financiero-economico di e crisis, nos ta haya e sensacion cu algo no ta cana debidamente dentro di e gabinete.

Loke ta duna mas forza na e sensacion aki ta e surgimento, hasta nos por bisa e renacimento di e ex-ministro di Infrastructura den e centro di e accion politico. Cu e tabata semper, desde su renuncia como mandatario, den background di su partido cu su conseho y experiencia nunca tabatin e menor duda cerca nos, pero su papel a bira un den promer fila atrobe. Ya siman pasa nos por a ripara esey, cu e anuncio cu el a keda nombra como miembro di e hunta di supervision di Refineria di Aruba NV, loke a conduci na pregunta den Staten durante tratamento di e proyecto di ley pa autorisa gobierno termina e contrato cu Citgo. Loke mas a straña nos ta e contesta estilo ‘matter of fact’ di nos prome minister, cu a declara cu su nombramento no tabatin nada straño cune, pasobra den e coalicion a keda palabra cu ta reparti e puestonan aki entre e partidonan… Y como cu e miembro saliente tabata representa POR, e entrada di e ex-ministro no tabatin nada cuestionable cune.

Nos ta kere cu e presidente di Stichting Deugdelijk Bestuur lo a scucha esaki cu hopi lamento, pasobra aki den un solo frase e prome minister a ‘kill’ tur pretension cu por tabata existi ainda pa e plannan bunita di integridad y bon gobernacion, pasobra a admiti sin mas cu reglanan di ‘good corporate governance’ ta irelevante y/o no existente den e ambito aki, y cu tur cos ta ‘business as usual’ y cu e bon intencionnan di e programa di gobernacion a keda na loke nan ta: un pida papel. Un biaha mas: no cu tur esaki ta sorprende nos, pasobra ta esey ta e practica cu nos tabata mira caba den tur empresa estatal durante e gobernacion aki, y esunnan anterior, asina ta cu nos no ta desilusiona. Ya nos sa unda nos ta para pa e resto di e trayecto.

Pero, bolbiendo na e situacion di ayera y awe, nos ta observa e ex-mandatario den centro di accion di su partido, dunando un guia completamente den su estilo, y esey nos no kier men den sentido negativo, pero si creando e impresion cu su presencia tabata necesario pa impulsa algo cu tabata mustra pega. Nos a papia ultimamente cu varios representante di sector priva cu no tabata mustra satisfecho cu e rumbo cu e negociacionnan cu gobierno tabata tuma, y esey ta un preocupacion legitimo. Tempo ta pasa y ainda no tin claridad total kico ta loke empleado cu a perde o por perde trabao, y empresarionan den problema, por spera di gobierno. Fin di e luna aki miles di hende mester haya algo pa no habri luna sin nada riba mesa. Y, honestamente, nos no ta mira e sentido di urgencia den loke gobierno, sigur na nivel administrativo, ta haciendo. Esaki por bira un problema grandi, tambe pa orden y seguridad publico, cu ni a corto plazo ni a lo largo lo beneficia nos comunidad.

Otro punto importante ta cu mester bin claridad den e contribucion cu sector publico mester haci. Bisa cu e sector ‘lo mester contribui” no ta algo cu por keda ripiti ora periodistanan ‘fastioso’ ta haci pregunta al caso; mester bin contesta contundente riba esaki. Pa loke ta esaki, e propuesta di e partido en cuestion tampoco ta satisface, unda ta papia di ‘congela’ e diferente premienan. Nos ta kere cu esey no ta suficiente, lo mester bin riba e no pago di e premienan tambe un reduccion sustancial di e salario bruto, pa yega na un suma cu por haci e diferencia. No mester lubida cu e aña aki Afl. 730 miyon ta bay na salario, mas di mitar di e presupuesto; no ta trata solamente di e famoso Afl. 472 cu ta maneha como gasto di personal. Bende shares di compania estatal riba su mes no ta mal idea, pasobra esey por trece mas control di otro partner den gerencia di e companianan. Asina, via porta patras nos por yega toch na (exigencia) di bon gobernacion corporativo cu cierto di nos ta anhela? (Des)bentaha: menos puesto politico pa reparti…