Dialuna den oranan di atardi pa anochi a tuma luga e celebracion na honor di e seleccion di damas U15 cu a representa Aruba na e 2022 Concacaf Girls Under 15 Championship na Tampa, Florida y logra e titulo di sub-campeon. Bon Dia Aruba a combersa cu Head Coach di e seleccion, Milvienne Henriquez, ken a conta con e preparacion di e ekipo a bay y con e experiencia tabata durante e campeonato aki.

Henriquez ta conta cu e preparacion a bay sublime. E seleccion ta parti di un programa cu AVB tin yama Academianan y di e academia nos ta saca seleccion. E hungadonan aki ta train henter aña, cuater biaha pa siman y e muchanan no tin sosiego.

Aña pasa, e mesun seleccion aki a representa Aruba na Republica Dominicana den e campeonato CFU Challenge Series, na unda nan a bay cu e titulo di campeon. Pa loke ta trata diferencia entre ambos campeonato, Coach Henriquez ta splica cu CFU ta un competencia di desaroyo bao di Concacaf.

El a agrega cu e seleccion aki ta prome biaha nan a competi como un ekipo y a marca historia como e prome ekipo di U14 cu ta coy campeon. Di eynan, el a sigui splica, e seleccion a train un aña largo durante cual nan tabatin weganan amistoso di nivelnan mas halto, entre otro contra e ekipo di Corsou U17. “E preparacion tabata hopi mas intensivo y e experiencia ya nan a gan’e caba, kiermen nan a bay miho prepara”, Coach Henriquez a bisa.

Coach Henriquez a remarca cu di e diferente aspecto durante e campeonato na Tampa, e aspecto cu mas a cay pisa pa e seleccion tabata e solo, e calor, e falta di biento y e hecho cu e muchanan tabatin dos wega tras di otro, un dia di descanso, bolbe hunga dos wega tras di otro y bolbe descansa un dia, te ora cu nan a yega final.

Pero Henriquez ta subraya cu durante nan preparacion di un aña, ora nan a haya sa e orarionan cu e ekipo di Aruba ta hunga y e temporada cu nan ta bay Merca, nan a cuminsa train na Aruba den e mesun orario pa wak si e muchanan por wanta e intensidad y asina nan ta mentalmente prepara pa e solo tambe.

Na principio Aruba tabata den e liga C, e liga di islanan di Caribe mas abao. Coach Henriquez ta splica cu Concacaf ta selecciona e liganan e a base di ranking di U17 y Aruba a yega di participa un biaha so den U17, kiermen nan a cay mas abao. Pero pa nan sorpresa, Coach Henriquez ta conta, dos dia prome cu nan a biaha hopi di e islanan chikito a cay afo pa problema di visa etc. y e ora Aruba a pasa pa liga B, den cual nan a topa paisnan manera Nicaragua y Honduras, cu ta ekiponan grandi.

“E bon ta cu e muchanan tabata bon prepara y nan a duna un bon bataya. E tabata un desafio, pero sigur bo ta wak nos futbol ta riba nivel y merecidamente nos a cay den e liga cu nos tabata merece di ta aden desde principio. Y e great di esaki ta cu hopi coach, por ehempel di Honduras y Nicaragua no a considera Aruba mes como un contrincante y pa nan sorpresa esey no tabata e caso y nos a haya hopi elogio di nan”, Coach Henriquez a agrega.

Pa loke ta e siguiente plannan pa e seleccion aki, Coach Henirquez a indica cu e prome cu tur cos nan lo tuma un break. E academianan ta sigui, e programanan di AVB ta sigui y lo bay tin un seleccion nobo di U14 ta bay forma atrobe pa CFU. El a menciona tambe cu ta bay tin U17 otro aña of aki dos aña, kiermen e muchanan lo keda prepara y pa asina zorg pa nan ta miho prepara pasobra U17 si ta cay den ranking y esey ta nifica cu e ta un competencia mas fuerte.

Kedando den e mesun tema di futbol, e seleccion di homber U14 tambe tabata presente na e celebracion y Erick Santos, miembro staff tecnico a anuncia cu e seleccion lo sali diabierna awo pa representa Aruba den e torneo CFU na Republica Dominicana

“Ta un torneo cu sigur nos lo duna tur cu tin. Den un siman lo tin cuater wega unda lo hunga contra ekiponan manera St. Kitts, Jamaica y Haiti. Preparando bon pa varios tempo caba ta train hunto y nos no tin niun duda den e ekipo aki y nos ta spera di por trece e titulo aki pa Aruba pa celebra cu comunidad di Aruba tambe”, Santos a bisa.