Coach di gimnasia, Vincent Wevers, kende ta den centro di controversia tocante abuso mental y fisico di e gimnastanan hoben, a nenga di a dal e muchanan y a bisa NOS cu e tabata devasta pa e acusacion.
Siman pasa, asociacion di gimnasia Hulandes, KNGU a suspende su coachnan di nivel top, incluyendo Wevers, y a stop training pa su team internacional femenino, pendiente un investigacion riba e acusacionnan.
Varios ex-gimnasta a bin dilanti den dianan recien pa papia tocante nan experiencianan di ricibi golpi, grito y wordo denigra, hopi biaha na un edad hopi jong.
Wevers, tata di campeon Olimpico, Sanne Wevers, a bisa cu el a adopta e cultura di e tempo durante cual el a cuminsa training. “Tabatin tiki espacio pa e gimnastanan tin algo di bisa”, el a bisa. “Pero cu loke mi sa awo, mi nunca lo a comporta di e forma ey. Mi nunca a usa violencia fisico y esey ta un acusacion cu a duel mi hopi. Mi no kier papia di esaki mas, ban warda e investigacion.”
Wevers a bisa cu e nunca a bay e gym cu mal intencion, ‘pero esey no ta bisa cu loke nos a haci tabata bon’. “E cultura tabata duro y di Spartano”, el a bisa, enfatisando e rol importante di peso durante training. “Awo mi ta ripara cu e gimnastanan a experiencia [e midimento di peso constante] den un forma completamente diferente y cu algun di nan ainda tin problema cu esaki.”
Despues di e acusacionnan inicial, Sanne, su ruman muhe y e resto di e team internacional Hulandes a duna un declaracion conhunto bisando cu nan no ta reconoce e potret cu a pinta den medionan di comunicacion tocante abuso fisico dentro di e deporte. “Te cu nos sa, abuso fisico y mental ta den pasado. Nos team actual ta opera den un ambiente deportivo saludabel y di nivel maximo”, segun e declaracion.
