Comite Olimpico Arubano a tene nan di 2 Asamblea General di e aña aki, durante e evento aki Federacion Gymnastico Arubano a haya aceptacion como miembro di COA. Tambe a aproba e plan di maneho y presupuesto 2017. A ricibi e siguiente relato di e anochi aki.
Recientemente Comite Olimpico Arubano a tene nan di dos Asamblea General di e aña aki den e ballroom di Holiday Inn Hotel. Mester bisa cu e 18 di e 24 federacionnan deportivo a haci acto di presencia na e anochi aki, mientras un federacion nobo esta e Federacion Gymnastico Arubano anciosamente tabata warda nan aceptacion como e di 25 miembro di COA. Cada aña den e lunanan di juni y december, e federacionnan deportivo miembro di Comite Olimpico Arubano ta bini hunto y reuni pa loke ta e Asamblea General di dicho organisacion.
Na e Asamblea aki un bes mas esnan presente a mustra nan satisfaccion di e direccion cu COA ta bin ta hibando e maneho di deporte di nan como miembro. Despues di varios pregunta, sugerencia y votacion di e miembronan presente den e sala, a aproba e relato financiero y e plan di e maneho cu Comite Olimpico Arubano lo bay hiba durante aña deportivo 2017, unda lo inicia cu e ciclo nobo pa e proximo cuatro añanan cu ta bini. Notabel ta cu tabata tin hopi intercambio di informacion entre COA y su miembronan, esaki den forma masha positivo y dinamico. A resumi e ciclo tras di lomba cual lo keda graba den Aruba su buki di historia como esun mas exitoso desde cu COA a ser funda na aña 1985. Nunca antes e resultadonan obteni pa nos atletanan den e weganan regional, continental y mundial tabata asina satisfactorio cu a culmina cu e shete atletanan clasifica pa e Weganan Olimpico di Rio de Janeiro 2016. COA ta consciente cu e lo no ta facil pa surpasa e exito di e ciclo aki. Pa logra esey lo mester bin cierto cambionan mientras mester bay traha extra duro pa yega na un otro ciclo exitoso. Pero no tin duda cu hunto cu tur e stakeholdersnan concerni conhuntamente lo lucha pa Aruba su deporte conoce un otro ciclo cu nos tur lo desea. Tur esaki ta un muestra cu tin un adelanto y crecemento enorme den e trabou desplega pa nos entrenadonan y nan federacionnan deportivo sin lubida e ayudo di parti di COA y su Comisionnan Tecnico, Medico y Anti Doping, como tambe e Direccion di Desaroyo. A elogia tambe e participacion di e atleta paralimpico Jesus David de Marchena kende a haci historia pa Aruba door di bira e prome atleta paralimpico cu oficialmente a representa Aruba den e Weganan Paralimpico di Rio 2016. COA y awor tur su 25 federacionnan miembro lo sigui traha duro y cu dedicacion, pa asina nos deporte dal un stap mas den e miho direccion desea.
