Ayera ariba rednan social e video di e hoben piloto Anfernee Emerenciana a bira viral na momento cu e hoben, co-piloto di e avion cu a sali for di aeropuerto internacional di Charlotte rumbo pa Aruba, a comparti e momento special cu e pasaheronan di e vuelo.
“Loke mester tabata un dia normal a resulta di bira un dia hopi special. Vuelo special pasobra esaki ta e isla bunita na unda mi a nace y crece te na e edad di 17 aña ora mi a bay biba Merca pa cuminsa mi trayectoria pa bira un piloto di aerolinea. Mi no por ta mas contento, emociona y orguyoso di por comparti e ocasion special aki cu boso,” Emerenciana a expresa den su video.
Despues di dirigi na tur presente den e cabina di avion den idioma Ingles, Emerenciana a dirigi algun palabra na Papiamento tambe na cualkier persona cu por tabata presenta den e avion cu ta ciudadano di Aruba.
“Damas y cabayeros bon bini abordo vuelo 874 pa Aruba. Ta un placer pa boso ta hunto cu mi awe den un momento asina special. Cu hopi orguyo y cu emocion inmenso ta bunita pa scucha nos bunita idioma Papiamento resona den un cabina di American Airlines,” e piloto a resalta.
Na aña 2022 Emerenciana a bira oficialmente un piloto pa e aerolinea American Airlines. Esaki, manera e mes a conta riba su pagina di Facebook e tempo ey, semper tabata su soño desde cu e tabata chikito.
“For di chikito mi a para na heki di aeropuerto Reina Beatrix soñando cu spera un dia mi por baha un di e avion grandi nan na Aruba. Cu apenas 17 aña mi a bay studia afo pa asina cuminsa cu e trayecto pa yega na e momento aki,” el a indica ariba su pagina di Facebook compaña pa potret di e momento cu el a bira oficialmente un piloto pa e aerolinea.
Desde e momento ey Emerenciana tabata spera cu pronto e lo por bula pa su dushi isla y transporta pasaheronan Arubianonan “cu hopi orguyo riba e vuelonan di American Airlines”, un momento cu finalmente el a logra di realisa.
