Den un opinion publica diahuebs den New York Times, co- fundado di Facebook, Chris Hughes, a bisa cu CEO Mark Zuckerberg a converti Facebook den un monopolio cu ta sofoca innovacion.
Hughes a bisa e poder di Zuckerberg ta ‘sin precendente y no Mericano’, y a bisa cu e enfoke riba crecemento di su co-fundado a ‘hib’e na sacrifica siguridad y civilidad pa clicks’.
Hughes a comparti camber cu Zuckerberg na Harvard, y a bandona Facebook na 2007 pa traha den campaña di barack Obama. Hughes a bisa cu e no ta doño di ningun parti di Facebook ni ningun red social.
“Mi ta sinti un sentido di rabia y responsabilidad”, el a skirbi, lamentando e ‘respuesta lento contra agentenan Ruso, retorica violento, y fake news’.
Hefe di vocero di Facebook, Nick Clegg, a responde na e crtitica di Hughes cu un declaracion bisando, “bo no ta enforsa responsabilidad door di pidi pa kibra un compania exitoso Mericano. Responsabilidad di companianan tecnologico por wordo logra unicamente door di introduci reglanan nobo pa internet. Esey ta precies locual Mark Zuckerberg a pidi.”
Sinembargo, Zuckerberg tabata hopi vago riba exactamente ki sorto di regulacion e ta preferi.
Criticonan, incluyendo Hughes, ta kere cu Facebook a adkiri demasiado poder pa continua intacto. Hughes a echo un propuesta di candidato presidencial democrata, Elizabeth Warren, kende tambe kier kibra Amazon y Google den companianan separa.
Den su piesa di opinion, Hughes a yama Facebook un monopolio cu mester wordo forsa pa separa di WhatsApp y Instagram, cu adkisicionnan den futuro prohibi pa varios aña.
Hughes tambe a pidi pa un agencia federal nobo regula companianan tecnologico kende ‘nan prome mandato ta pa proteha privacidad’.
Debate a cuminsa pa un ley federal di proteccion di privacidad. California tin un ley cu ta drenta den vigor na januari, y reglanan di privacidad di Union Europeo awo ta un aña bieu.
Mientras tanto, Facebook ta enfrentando un multa di $5 miyon di e Federal Trade Commission tocante violacion di privacidad. Pero criticonan ta bisa cu e suma ta ridiculo pa un compania cu aña pasa tabatin entrada di $55.8 biyon.
Hughes ta bisa cu el a likida su accionnan di Facebook na 2012, aña cu el a bira editor di The New Republic. El a bisa cu e no ta inverti den rednan social. Aña pasa, Hughes a publica un buki dunando sosten na un entrada basico universal (basisincomen). Na 2017, Forbes a calcula su balor neto na mas di $400 miyon.
