E compania aereo Lamia y e avion cu a cay cu un team di futbol Brasilero na Colombia no ta desconoci na Aruba. Ta asina cu dos aña pasa, Linea Aerea Merida Internacional di Aviacion Compañia Anonima (Lamia) a purba di opera na Aruba. Te hasta nan a registra e avion cu a cay ayera cu e matricula P4LOR.
Lamia ta un compania aereo chikito naci na Mérida (Venezuela). Despues cu nan a dicidi di opera na Aruba pa realisa vuelonan regional; nan a cambia di plan pa bay Bolivia. E piloto di e avion cu a cay na Colombia tambe tabata un persona conoci na Aruba den mundo di aviacion. Ta trata di Miguel Quiroja kende tabata doño di e avion y co-doño di e compania Lamia cu tabata transporta e team di futbol Chapecoense di Brasil. E tragedia aereo aki a laga 75 morto, mientras cu otro 6 persona a sobrevivi.
E compania aki a nace na 2009 pa yuda desaroya e turismo regional na Merida. Despues nan a purba di opera for di Aruba, pero finalmente nan a bay pa Bolivia na aña 2014. Durante e ultimo añanan e compania tabata realisa principalmente vuelo charter pa ekipo di futbol Latino Americano y algun seleccion nacional.
Nan flota di avion tabata tipo British-Aerospace BAe-Avro 146, cu mas cu 16 aña bieu. E avion cu tabata transporta e team Chapecoense, tabata un Avro Regional Jet 85 (RJ85). Esaki tabata e unico avion di nan flota di tres cu tabata den operacion. E otro dos avion di e aerolinea aki tabata daña y den reparacion, segun informacion compila pa Bon Dia Aruba. E tragedia aereo di e compania Lamia tabata similar na e accidente di un avion di Avianca cu a cay dia 25 di januari 1990 cerca na New York
