Un investigacion di CNN na Spaño a revela un presunto red di benta di paspoort Venezolano pa ciudadano di pais di Medio Oriente a cambio di placa. Gobierno di Nicolas Maduro a nenga e acusacion aki. E investigacion di e cadena di television ta basa riba testimonio di Misael López, ex-consehero legal di embahada di Venezuela na Irak entre 2013 y 2015. Lopez a ser despedi na 2015, tempo cu el a denuncia benta di visa y paspoort.
“Hende na Irak tabata paga hopi placa pa haya un visa of un paspoort, nan tabata paga te 15 mil dollar”, Lopez a informa. El a duna documento cu ta proba e supuesto red di corupcion di benta di documento diplomatico tambe. “Nan no ta worry si e hende cu lo paga 15 mil dollar ta un terorista o ta un hende grandi cu kier asilo na Europa”, Lopez a bisa. Lopez ta biba awor na Spaña.
Marco Ferreira, ex-general di Guardia Nacional di Venezuela, y cu a participa na 2002 na e revolte contra gobierno di presidente Hugo Chávez, a bisa CNN cu situacion di benta di paspoort a bin desde hopi tempo atras. Ferreira ta biba awor na Miami (Merca) y tabata director di Direccion Nacional di Identificacion y Estranheria di Venezuela entre 2001 y 2002 (oficina cu ta duna documento manera paspoort y visa) y a sigura cu el a mira con funcionario di halto poder tabata duna paspoort na persona sin nacionalidad.
“Ta hopi facil pa bira Venezolano of bisa cu a nace na Venezuela”, general Ferreira a splica. E investigacion aki ta envolvi directamente Tareck El Aissami, vice- presidente di Venezuela, cu ta acusa di ordena e tramite di 173 paspoort pa persona for di Medio Oriente entre 2008 y 2012.
