Dia 7 di februari National Geografic a trece dilanti cu Trinidad & Tobago tabata bibando momentonan di inkietud den e awanan dilanti nan costa sur debi na un barco di origen desconoci cu a bolter lagando atras un cantidad grandi di oilspill den lama.
Wardacosta di Trinidad & Tobago a detecta pa prome biaha e derame aki e dia ey ubica na 6 kilometer di e costa Studley Park, segun e secretario hefe di Asamblea Nacional di Tobago, Farley Augustine a señala den un conferencia di prensa.
For di e momento ey, a cuminsa instala baricadanan pa purba di stop e derame cu pa dia 14 di februari ya caba a extende den un linea di 12 kilometer, 1000 boluntario ta bin purbando di protege e areanan pa aisla e material toxico y por evalua e impacto den e bida marino y silvestre caminda e prome minister Keith Rowley a señala cu esaki ta “un emergencia nacional.”
Despues cu autoridadnan a logra identifica e barco “Gulfstream” na unda buzonan cu tabata duik a logra mira e nomber na un banda di e barco cu supuestamente a causa e derame, sin duna mas detaye.
Como parti di e investigacion cu a ser habri pa e derame aki, Comunidad di Caribe (CARICOM) a tuma contacto cu autoridadnan di Panama y di Aruba pa purba confirma e origen di e embarcacion aki ademas di otro boto procedente for di Panama yama “Solo Creed” cu tabata bayendo den direccion Guyana y cu supuestamente tabata lastra e barco “Gulfstream.” Segun loke e website France24 a indica.
Igualmente a sigura cu “imagennan di satelite a mustra Solo Creed lastrando un obheto dia 4 di februari di 2024. The National Coastal Surveillance Radar Centre (NCSRC) por a utilisa e informacion aki pa monitoria e barco den awanan di Trinidad & Tobago,” segun e texto di Ministerio di Siguridad Nacional di Trinidad & Tobago a señala y tambe a sigura cu NCSRC a perde contacto via radar cu e dos embarcacion aki.
Na Aruba, 26 di februari ultimo Crisis Management Office (CMO) a anuncia cu Aruba a pasa di codigo geel pa codigo oraño pa loke ta trata e incidente di oilspill na Trinidad & Tobago, den esaki, director di CMO, Rino Hermans, a declara na prensa internacional cu Gobierno di Aruba tabatin planea pa activa un ekipo di 60 hende, cu tabata inclui personal di prome auxilio y personal di limpiesa, pa atende cu e situacion di derame di petroleo si esaki lo yega costa di Aruba, lo cual efectivamente a tuma luga diasabra ultimo 2 di maart caminda a detecta teerballs na un luga conoci pa CMO, no ta un situacion hopi serio mescos cu na otro paisnan pero mester keda alerta segun loke prome minister Evelyn Wever-Croes a declara.
No obstante esaki por ta posibel cu nan ta bini for di e incidente na Trinidad y Tobago, tambe ta posibel cu nan a bin via e ruta di bapornan entre Jamaica y Trinidad door di tanker di petroleo, manera nan ta sigura.
Un di e potret ta esun di e barco na Trinidad & Tobago.
Teerballs ta forma ora un crudo di viscosidad halto ta interactua cu awa, e mancha cu a plama for di Tobago no por ta e origen di e teerballs aki. Mas probabel ta procedente di “illegal discharge” di azeta cerca di costa di Aruba. Posiblemente di barconan cu ta nabega pa Venezuela pa hiba of busca crudo. E otro posibilidad ta oilspill procedente di Lago di Maracaibo, na unda oilspill ta hopi comun ya cu tur instalacion y tuberia ta den mal estado y tin constante “leakage” segun loke medionan Venezolano ta reporta y ademas ta bati alarma cu deramenan ta persisti y ta complica e situacion den e zona aki.
Mediante un comunicado di prensa, CMO a informa comunidad cu for di momento cu a ricibi rapport tocante e petroleo cu a bay e costa di Boneiro, Aruba a intensifica su nivel di alerta pa Codigo Oranje y un team di Maneho di Incidente a keda establece inmediatamente conforme cu e plan di control di derame di petroleo (OILIE).
Aruba a intensifica su esfuerso pa scout e costa pa medio di dividi e costa den cinco sector, caminda ta tuma luga exploracion intensivo pa diferente instancianan manera DNM, FPNA, DOW, hotelnan bao liderazgo di ATA bou di Cluster 8, y e Havenmeester.
Nan tambe ta señala cu por spera pa e siman cu ta bini teerballs, pero scout recien y informacion, manera tambe e Mapping Rapido EMS pa delinea area di impacto cu ta warda ainda, ta sugeri cu e mayoria di e mancha a pasa Aruba. Sinembargo, ainda lo tin teerballs cu ta bay acerca durante e proximo dianan, CMO ta haci un yamada na poblacion pa raporta cualkier mancha di petroleo cu lo por mira, hasta si nan ta situa na luganan remoto. Pa reporta esey por manda un e-mail na: cmo@crisis.aw
Accionnan di limpiesa inmediato ta bay tuma luga si e patch of teerballs ta ubica na sitionan unda publico ta landa y tambe si ta ubica na unda turtuga tin neishi of nan ta usel’e pa neishinan, sinembargo, tur patch off teer riba baranca lo keda si nan no tin risico pa hende of bestia, segun CMO a informa.
Centro Regional de Emergencia, Informacion y Capacitacion pa loke ta trata Contaminacion Marina – Caribe (Rac-Rempeitc Caribe) ta un di e cuatro centro di Actividad Regional di programa Ambiental di Caribe PNUMA-CAR/RCU estableci na 1995 y ta conta cu expertonan den e materia afilia boluntariamente na estadonan suscrito na Cartagena Convention Oilspill Protocol di Nacionnan Uni via e organismo di United Nations Environmental Program cu sede regional na Kingston, Jamaica y Aruba tambe ta signatorio di e tratado aki y su protocolnan.
