Recientemente Crisis Managament Office Aruba (CMO) a presenta e Plan di Seguridad 2024 pa Carnaval. Den e documento aki ta delinea detayadamente e medidanan pa garantisa seguridad di carnavalistanan, tanto esnan cu ta participa den parada como tambe esnan cu ta bay wak parada y pueblo en general.

Carnaval ta un di e tradicionnan mas gusta y emocionante y ta un parti esencial di e cultura di Aruba. Un cantidad grandi di turista ta bin di afo durante e temporada aki specialmente pa disfruta di Aruba su carnaval.

Como autoridad responsabel pa maneho di crisis y siguridad publico na Aruba, CMO tin e meta pa sigura cu e celebracion aki no solamente ta uno dibertido y memorabel, pero tambe uno sigur y plania cu cuidao.

Durante e ultimo 69 añanan, CMO Aruba a traha exitosamente pa garantisa e seguridad y bienestar di tur hende envolvi den Carnaval. Esaki ta inclui no solamente e participantenan y mirones, si no tambe esunnan encarga cu e organisacion y ehercicio di e festividad aki.

“Nos esfuerso ta pa sigura cu tur hende envolvi tin un experiencia positivo y sin preocupacion durante Carnaval,” CMO Aruba a indica.

E Plan di Seguridad pa Carnaval di Aruba 2024, Edicion 70 ta resultado di cooperacion entre diferente instancianan gubernamental, autoridadnan, organisacionnan, y comunidad en general. E plan aki ta inclui medidanan pa garantisa seguridad publico, maneho di fluho di trafico, duna asistencia medico caminda cu mester, y trata situacionnan di crisis rapido- y eficientemente.

A base di edicionnan anterior di e documento aki pa celebracionnan anterior CMO a haci ahustacionnan necesario pa mehora e seguridad.

“Nos kier anima tur hende pa tuma responsabilidad pa nan propio seguridad y esun di otro durante Carnaval. Sigui instruccionnan di autoridad, sea respetuoso cu otro y yuda pa Carnaval di Aruba 2024, Edicion 70 keda un evento cu nos lo keda recodra pa un tempo largo,” CMO a resalta.

E plan di seguridad aki ta un instrumento crucial pa sigura cu Carnaval 70 di Aruba ta un evento sigur, exitoso y inolvidabel.

E instancianan gubernamental manera Cuerpo di Bombero, Cuerpo di Polis, servicio di Ambulans ImSan, DTI, DOW, DVG, HOH, CMO y SMAC entre otro ta forma parti esencial den e plan di seguridad pa carnaval y cada un tin nan medida- y tareanan cu nan mester sigui pa e seguridad di un y tur.

Cuerpo di Bombero ta responsabel pa tanto medidanan preventivo como tambe reacciona directo na situacionnan di emergencia pa sigura seguridad general durante e eventonan di Carnaval y brinda sosten necesario den caso di incidentenan di candela, accionnan cu substancianan peligroso of urgencianan medico.

Cuerpo di Polis ta responsabel pa mantene orden publico, maneha seguridad di trafico y reacciona efectivamente na situacionnan di emergencia pa sigura seguridad general durante e eventonan di Carnaval y pa brinda e sosten necesario ora cu tin mester.

E departamento di Trafico di Cuerpo di Polis Aruba tin como responsabilidad sigura seguridad di trafico, regula mobilidad y coordina cu otro servicionan di urgencia pa crea un ambiente sigur durante e eventonan di Carnaval.

Directie Volksgezondheid (DVG) ta enfoca ariba salud y bienestar di e participantenan y mirones durante e eventonan di Carnaval. Nan ta brinda instalacionnan medico, duna informacion tocante salud y seguridad, y coordina cu servicionan medico pa por reacciona rapidamente na situacionnan di emergencia medico, contribuyendo na seguridad general y bienestar di tur presente.

Servicio di Ambulans IMSAN tin como responsabilidad primario brinda cuido medico urgente y transporta pashent pa instalacionnan medico den caso di emergencia. Di e manera aki nan ta contribui na seguridad general y bienestar di e participante- y mirones durante e evento di Carnaval.

Hospital Dr. Horacio Oduber (HOH) ta hunga un rol crucial den brinda cuido medico y sosten durante situacionnan di emergencia durante e eventonan di Carnaval, contribuyendo na seguridad general y bienestar di e participante- y mirones. Nan ta bon ekipa pa trata pashent y garantisa un respuesta medico organisa y efectivo den situacionnan di emergencia.

Dienst Openbare Werken (DOW) tin como responsabilidad pa sigura cu tur e baricadanan ta wordo usa di un manera efectivo y sigur durante eventonan pa garantisa seguridad general y fluidez di e evento.

Dienst Waarkeuring en Hygiene (Servicio di Inspeccion y Higiena) tin e responsabilidad di sigura cu normanan di salubridad y higiena ta wordo cumpli riba tereno di e evento, particularmente den area di preparacion y consumo di cuminda.

Stichting Maneho di Aruba su Carnaval (SMAC) ta encarga cu diferente aspecto, entre nan brinda un programa varia y sigur durante e temporada di Carnaval. Nan ta coordina e festividadnan, tuma medida di seguridad, y traha hunto cu servicio di urgencia y boluntarionan pa garantisa e seguridad general y cu tur hende por disfruta di e eventonan.

Boluntarionan ta hunga un rol importante den sosten di e diferente servicio- y organisacionnan cu ta responsabel pa seguridad y bienestar durante e eventonan di Carnaval. Nan ta contribui na seguridad general door di nan envolvimento y esfuerso pa crea un experiencia sigur y agradabel pa e participantenan y esnan cu ta bay pa wak y disfruta di e eventonan di carnaval.

Crisis Managment Office (CMO) tin e responsabilidad pa anticipa y reacciona adecuadamente na situacionnan di emergencia y crisis durante e eventonan di Carnaval. CMO ta coordina e respuesta na crisis, duna informacion vital y sigura un maneho organisa y efectivo di situacionnan di emergencia.

Gruponan di Carnaval tambe ta hunga un rol activo den e sosten y promocion di e actividadnan, y mester sigura tambe e seguridad di nan propio participantenan. Tur grupo di Carnaval tin e deber di tin personal di seguridad pa por aborda cualkier tipo di inconveniente y problema cu por surgi.

Dienst Technische Inspecties (DTI) ta encarga cu e keurmente di e diferente tipo di vehiculo cu ta wordo usa pa den parada y otro actividadnan. Nan ta controla tur e instalacionnan di electricidad y gas, y nan ta encarga tambe pa controla cu tur norma y standra ta wordo cumpli. Falta di cumplimento di esakinan tin consecuencia.