Sindicato FTA ta condena e echo

Ayera mainta sindicato FTA a condena e echo cu gerencia di banco CMB no a reconoce e afiliacion di nan trahadonan y ta lamenta cu nan ta bay contra e derecho di trahadonan pa busca nan representacion sindical.

“Un banco cu ta haci dificil pa e trahadonan haci uzo di un derecho cu nan tini. Un derecho basico pa organisa nan mes”, asina e sindicalista di FTA Rudy Geerman a bisa.

Sr. Geerman den compania di abogado di FTA, Hose Figaroa a laga sa cu e trahadonan ta malcontento cu un carta cu nan a ricibi na bispo di cambio di aña, caminda mayoria di nan beneficionan a wordo drasticamente reduci te na mita. Esun mas perhudica ta e trahadonan cu tin mas aña di servicio ya cu te hasta un tipo di bono cu nan ta haya pa nan añanan di servicio a wordo reduci. Tambe otro beneficionan cu nan tin manera seguro di bida, hipoteca, prestamo, hubilario, etc..

Huridicamente abogado Figaroa ta haya esaki inaceptabel, ya cu e decision aki a wordo tuma di un forma unilateral argumentando cu e banco su situacion financiero no ta bon. Tambe debi entre otro na e impacto cu e horcan a laga atras na St. Maarten, nan no haci fiesta pa fin di aña. Mientras cu durante e añanan aki cu economia no a presta su mes, e sector bancario como instancia financiero si a bay dilanti y gana placa, segun FTA.

Afiliacion
FTA kier sinta cu gerencia di CMB pa atende cu e situacion aki, sinembargo nan ta lamenta cu CMB no kier reconoce nan como sindicato di nan trahadonan. El a bisa cu e banco tin alrededor di 300 trahado, y actualmente mas cu 150 trahado a afilia na FTA. Nan ta considera cu nan ta mayoria di e trahadonan caba, ya cu di e 300 trahadonan tin algun di nan cu ta parti di e staf y cu no por afilia na e sindicato. FTA kier evita e proceso mas largo di convoca un referendum via Mediador di Gobierno, y kier mas bien bay via un proces-verbaal caminda CMB ta reconoce FTA como e sindicato di nan trahadonan. Pero si banco no ta reconoce FTA, e sindicato aki ta bay cana e caminda di referendum.

Nan ta haya cu awor cu e trahadonan ta determina pa mantene nan afiliacion na sindicato, gerencia di e banco no kier sinta negosha cu FTA, pero si cu e trahadonan. Pues aworaki cu e trahadonan a dicidi di organisa nan mes, segun e sindicalista, gerencia di e banco ta manda un carta caminda nan ta bisa cu aworaki nan ta dispuesto pa papia cu e trahadonan y splica nan dicon nan a tuma tal decision. “Kiermen si e trahadonan no a protesta. Si e trahadonan no acerca un sindicato, e compania lo a djis impone e cambio riba nan y boso nan no tin nada di bisa”, segun e sindicalista sr. Geerman su declaracion.

Sindicalista sr. Geerman ta spera cu no tin represalia contra e trahadonan cu a bin cu e iniciativa di acerca FTA pa representa nan sindicalmente. Si esaki sosode e no ta descarta cu lo bin accion. Ya cu den un carta na e trahadonan gerencia ta bisa cu ‘na dolor di nan curason nan a tuma nota cu e trahadonan a afilia na un sindicato’. E ta haya cu ora cu bo ta papia di dolor di nan curason ta pasobra bo a perde algo. Mientras cu esaki ta un derecho minimo cu e trahadonan tin, di organisa nan mes.

Nan ta dispuesto pa sinta cu gerencia di e banco pa busca solucion, pero si nan no kier, nan lo evalua kico lo ta e siguiente paso. Segun sindicalista Geerman, e trahadonan na servicio di e banco aki den e otro isla di nos region tambe ta na expectativa di locual ta sosode na Aruba, ya cu nan tambe a ricibi e mesun tipo di carta aki cu ta kita of re corta cierto beneficionan.

Sinembargo e sindicato no ta compronde pa kico CMB ta nenga di reconoce nan, y nan no ta compronde ki daño nan por ocasiona of ki miedo nan tin pa acepta nan como representante di nan trahadonan. FTA ta haya e actitud aki contradictorio, ya cu mientras e banco aki ta miembro di Asociacion di Bankero Aruba (ABA) pa asina defende nan interesnan, di otro banda nan ta nenga nan trahadonan e derecho pa asocia nan mes na e sindicato aki.

Tambe nan ta haya contradictorio cu mientras CMB a yega di pone resistencia den pasado pa nan trahadonan no afilia na sindicato, e otro banconan cu ta forma parti di ABA, Arubank, Banco di Caribe y RBC, si FTA ta representa nan trahadonan y tin un contracto colectivo (CAO) firma pa añanan caba. P’esey, sr. Geerman no ta compronde kico banco tin di sconde pa e trahadonan di CMB bira miembro di e sindicato.

Bon Dia Aruba a tuma contacto cu e PR Officer di e banco pa trece nan banda di medaya, pero no tabata posibel.