Aruba Lions Club hunto cu 7 club di servicio pa comunidad a organisa un conferencia di prensa pa anuncia nan proyecto di mas grandi pa e aña aki, cu lo tuma luga diasabra 25 di mei proximo na Stichting Ambiente Feliz.
Representantenan di Kiwanis Club, Quota Club, Aruba Women’s Club, Rotary Club of Aruba, One Happy Island Lions Club y Rubin Ponson di Aruba Lions Club a menciona cu nan tin basta tempo trahando riba e proyecto aki pa asina e por mustra comunidad kico ta e trabaonan boluntario di e gruponan aki.
E miembronan di e 8 club aki y esnan cu ta desea di uni na e iniciativa, ta bay uni pa un proyecto cu ta bay haci diasabra 25 di mei na Stichting Ambiente Feliz, cual e aña aki ta bay tin e oportunidad di ricibi e gruponan cu e diferente trabao cu nan lo haci, por ehemplo, riba e edificio, verf, haci limpi, entre otro cos cu nan mester drecha, segun Ponson a expresa.
Durante e trabaonan aki, clientenan di Stichting Ambiente Feliz ta bay entretene door sali riba bus pa un trip di mita dia mientras cu e trabaonan ta ser haci na nan edificio.
E idea aki a cuminsa for di algun tempo, caminda varios reunion a tuma luga entre e clubnan, y “aworaki ta bunita pa mira tur e clubnan bin hunto haciendo un trabao pa comunidad tambe. Union ta forsa y esey ta locual nos ta bay demostra tambe, cu hopi miembro hunto ta bay haci e trabaonan aki.”
Ponson a informa cu cada club ta contribuyendo cu un suma y nan ta bay haci un donacion cu lo cubri e gastonan cu nan ta bay tin, unda algun comerciante tambe por duna nan aporte.
Pero esaki no ta e prome biaha cu nan ta haci un proyecto asina grandi. Ponson a splica cu hopi aña pasa nan a yega di haci actividadnan asinaa, pero e ta algo cu ta tuma hopi tempo prome cu nan por a logra un biaha mas despues di tanto aña pa uni tur club back.
“Nos ta contento y mi ta kere cu den e hopi reunion cu nos tabatin pa nos yega na e punto aki, nos por a sinti caba e gana cu tin pa haci e trabaonan aki den conhunto. Fuera di topa nos coleganan di otro club di servicio, mi ta kere ta un oportunidad pa tur topa hunto y alabes haci un bunita proyecto pa comunidad,” Ponson a sigura.
Igualmente el a menciona cu nan trabaonan ta boluntario y ta importante pa comunidad sa tambe cu semper cada un di e gruponan aki ta keda conta cu sosten di comunidad y esaki ta caminda nan fondonan ta sali, pa nan por haci e tipo di proyecto aki. Cada club tin nan mesun proyectonan unda comunidad por haci donacion ora nan tin actividadnan di fundraising y mira unda y con e trabaonan aki ta ser haci.
“Hopi biaha e clubnan ta haci trabao cu no ta tur ora y na tur momentonan ta proyectonan cu por sali pa comunidad mira, vooral ora nos ta papia di proyectonan riba salubridad. Pero si e clubnan ta trahando den diferente area, p’esey nos ta bay demostra cu proyectonan di cada club ta necesario pa tin e fondo y por haci e esakinan,” Ponson a bisa.
Ora nan a cuminsa cu e idea pa e proyecto y calcula e gastonan cu lo por bay tin den esaki y reparti entre e clubnan, “na niun momento un club a duda cu nan lo por yuda cu e gastonan aki.”
Nan a logra traha un logo riba un T-shirt cu mayoria di e club lo usa e dia ey. E ta un logo unda tin varios man teni na otro cu ta forma un curason y den cada curason tin e logonan di e clubnan.
“E logo pa nos ta nifica algo bunita y algo cu locual nos ta representa e grupo riba e dia di e actividad. Y tambe ta un bunita recuerdo pa e dia 25 di mei keda pa cada miembro di cada club den nan curason, cu nan a contribui cu e proyecto aki,” el a expresa.
For di trempan mainta di 25 di mei na Stichting Ambiente Feliz nan lo haci nan trabaonan tanto pafo y paden di edificio, hasta trabaonan di cashi paña cu nan lo tin mester por ehemplo, “pa nos laga e luga unda tur e clientenan di e organisacion tin e derecho di tin un bida mescos cu nos ta hib’e,” Ponson a bisa.
Pa esaki, nan tin algun material pero te ainda nan ta desea di haya caminda Ponson a informa cu ayudo financiero di cualkier instancia semper ta bonbini “pa motibo cu lo cual nan a pone pa e presupuesto aki lo ser duna na e instancia aki despues.”
Den futuro nan tin planea pa realisa otro proyectonan manera esaki pero na otro organisacion cu lo por mester di dje.
Pa personanan interesa di participa den e proyecto aki of duna un aporte pa e proyecto, lo por acerca na cualkier di e clubnan menciona.
