Diasabra ultimo tabata un dia di spirito comunitario y di mustra unidad na unda 8 club di servicio manera Aruba Lions Club, Quota Club, Rotary Club, Women’s Club, Kiwanis San Nicolaas, Kiwanis Aruba, and One Happy Island Lions Club a uni nan forsa pa duna Stichting Ambiente Feliz un facelift mereci.
Pa esaki, e clubnan manera Kiwanis Palm Beach a señala cu Stichting Ambiente Feliz y su clientenan tabata merece un facelift pa asina sigui yuda esnan cu tin necesidadnan special, “nos esfuerso no solamente a mehora e ambiente sino cu tambe a trece sonrisanan y alegria na tur esnan involucra, e proyecto aki ta resalta nos compromiso comparti di sirbi y mehora nos comunidad,” nan a señala a traves di un publicacion riba nan rednan social.
E idea di e proyecto aki cu a tuma luga diasabra ultimo 25 di mei aki a cuminsa for di algun tempo caminda varios reunion a tuma luga entre e clubnan y “aworaki ta bunita pa mira tur e clubnan bin hunto haciendo un trabou pa comunidad tambe, uni ta forsa y esey ta lo cual nos ta bay demostra tambe cu hopi miembro hunto ta bay haci e trabounan aki.” Nan a señala durante un conferencia di prensa ora nan a trece dilanti e proyecto.
Igualmente nan a menciona cu nan trabounan aki ta boluntario y ta importante pa comunidad sa tambe cu semper cada un di e gruponan aki ta keda conta cu sosten di comunidad y esaki ta caminda nan fondonan ta sali, pa nan por haci e tipo di proyecto aki, cada club tin nan mesun proyectonan unda comunidad por haci donacion ora nan tin actividadnan di fundraising y mira unda y con e trabounan aki ta ser haci.
Diasabra ultimo for di trempan mainta na Stichting Ambiente Feliz nan a haci nan trabounan tanto pafo y paden di edificio, hasta trabounan di cashi paña cu nan tabatin mester por ehemplo, “pa nos laga e luga unda tur e clientenan di e organisacion tin e derecho di tin un bida mescos cu nos ta hib’e,” Rubin Ponson di Aruba Lions Club a bisa.
Durante e trabounan aki, e clientenan di Stichting Ambiente Feliz a bay entretene caminda nana sali den bus pa un trip di mita dia mientras tanto cu e trabounan tabata tumando luga na nan edificio.
