Club Stampia Aruba ta buscando mas miembro: Balor historico di nos stampia y biyete no mester bay perdi

Club Stampia Aruba tin 13 aña di existencia y nan ta buscado personanan interesa pa bira miembro di nan club. No solamente esunnan cu ta gusta colecciona stampia sino moneda of biyete di balor di diferente pais.

Ruben Abath kende ta presidente di e club aki a declara na Bon Dia Aruba cu nan ta consisti di 8 persona actualmente. Antes nan tabata consisti di mas miembro, pero pa motibo laboral of di otro indole, nan no por sigui den e club aki.

Ora cu nan a bin cu e club aki nan intencion tabata pa purba di sigui e pasonan di e grandinan cu a bay laga nos caba. Aruba a yega di conoce basta club di stampia, specialmente tempo di Lago, caminda e Mericanonan tabata bin hunto pa haci e cambionan di stampia entre nan mes y hendenan local tambe.

Apesar cu nan ta un grupo chikito, nan tin basta variedad y informacion di stampianan. Nan coleccion ta varia hopi y nan entusiasmo t’ey tambe. Algun lunanan pasa nan a organisa un exposicion masha atractivo na Biblioteca Nacional Aruba. E apertura y exposicion mes tabata bon, pero el a keda habri un par di dia so pa motibo di e medidanan cu e Covid-19 a trece cune na Aruba. Lamentablemente e entusiasmo y trabao cu nan a hinca den e exposicion aki no a duna su fruta pa largo tempo, pero si el a wordo bon uza.

E tabata un coleccion di stampia masha varia, pasobra cada un di nan miembronan tabatin un topico ariba nan mes. Tabatin un topico Vaticano, Cas Real, Aruba, barbulet y flora.

Coleccion

Di su banda, Abath no solamente ta colecciona stampia sino biyete y placa di oro y plata. E ta haya cu e tipo di hobby aki ta yuda pa tene nos mes bezig y socialisa cu mas hende.

Apesar cu uzo di biyete y stampia ta birando keto bay obhetonan di museo, mirando e desaroyo di awendia. Tin menos uzo di cash y mas uzo di carchi di banco. Pero tambe menos uzo di post y mas uzo di E-mail. Abath ta admiti berdad cu hopi caminda no ta aceptando placa cash pa haci transaccion. Pero e ta mira cu recientemente Banco Central di Aruba a bin cu un serie di biyete nobo, locual a costa hopi placa pa bin cune. Ta hasta nan a gana un premio cu e papel di 100 florin. Tur cos ta modernisa, pero na Merca e tipo di club aki y tambe di stampia, nan miembronan ta hendenan jong. El a bisa cu e asociacion di stampia na Merca ta integra pa hendenan bao di 30 aña.

E intencion tras di esaki ta pa e balor historico cu e biyete y stampia tin no bay perdi. Den pasado e club aki a yega di haya donacion di persona cu a bay laga nos, y nan famia no ta interesa den e coleccion di stampia cu nan ser keri a laga atras. Ora cu e club ta haya e tipo di donacion aki, nan ta reparti den meymey di nan miembronan. Pero awor nan intencion ta esun di por recluta mas miembronan. Nan no kier bira un club di mas cu 60 hende cu nan no por maneha. Pero si un club di hendenan comprometi pa nan fortalece nan club.

Abath a bisa cu nan sa cu na Aruba tin hopi hende cu tin stampia, y nan no mester laga nan den caha di sapato abao trapi pasobra nan ta bay daña. Nan tur ta bonbini! Tur luna riba e di dos diasabra nan ta reuni un rato for di 1’or te cu 4’or atardi na Biblioteca Nacional Aruba na Playa. Tambe nan por tuma contact cu e club aki pa medio di e cel: 566-1793.