Monumenten Funds (1).jpg
E iniciativa di gobierno pa bin cu estimulo pa bida nocturno lo por bin bek na Playa y San Nicolas,  director di Stichting Monumentenfonds Aruba (SMFA) Anne Witsenburg ta haya cu nan tin e mesun bista pa trece bida na Playa y den centro di ciudad; pero mester evalua e forma con pa haci esaki. 
 
E ta kere cu e maneho cu gobierno lo kier bin pa trece bida nocturno na Playa, ta algo cu mester consulta y debati cu e partnernan, entre otro cu e fundacion aki, e comerciantenan estableci den e area aki, etc.  ya cu sigur nan tin e mesun meta pero e asunto ta con pa logra e meta aki. E no ta kere cu ta e club nocturno so lo por trece bida na Playa. Sinembargo e ta kere cu e parti di bin cu boutique hotel y edificio adecua pa biba aden, ta esunnan mas dificil pa logra pero esunnan cu lo permiti pa haya bida constante den e area aki.
 
“Nos ta kere cu Wilhelminastraat ta bay bira un caya hopi importante, cu hopi monumento y hopi bida.” Pero e ta spera cu e sector aki por haya area mas berde, mas boutique hotel y mas hende cu ta opta pa  biba den centro di ciudad.   
E ta haya cu mudamento y presencia di hendenan bibando na Playa mes  lo trece berdaderamente bida den centro di ciudad. Tambe  mester bin cu actividad artistico pa nos studiantenan y hobennan frecuenta Playa. Aworaki tin mas tanto oficinanan y restaurantnan cu ora cu nan ta cera, e area aki ta morto.
 
Pero di otro banda e fundacion aki ta consciente cu biba den monumento ta hopi caro; y mester evalua con pa canalisa e posibilidad aki. Ya cu si un hende ta habri pa ehempel un restaurant, nan ta inverti pa haya nan placa bek. Pero si e hendenan  ta bin pa aplica pa un cas financia pa FCCA den area aki lo resulta hopi caro. P’esey SMFA ta trahando conhuntamente cu otro instancianan pa wak kico nan por logra riba e asunto aki.
 
Wilhelminastraat
Wilhelminastraat  ta un caya monumental cu a pasa den un proceso di renobacion caminda algun di  nan joyanan arkitectonico  a wordo  rescata y otronan ainda ta pendiente pa nan wordo renoba. Ademas actualmente otro edificio monumental ta na benta. Gobierno a pone na benta Warda di Polis bieu  y dia 9 di december lo haya sa cua comerciante of grupo a entrega un bid pa cumpra e edificio aki.  “E tambe ta un monumento hopi importante pa Wilhelminastraat”, Sra. Witsenburg ta declara na Bon Dia Aruba.
P’esey e fundacion aki ta trahando riba con pa desaroya e monumento arkitectonico aki,  ya sea cu e fundacion lo cumpra nan pa restaura nan y huur nan. Of di otro banda si tin hende di e sector priva interesa pa inverti den e monumentonan ey. “No ta importante ken ta bay hacie, pero pa nos ta importante cu algo por cambia”. E echo ta pa switch  e proceso aki,  ya cu SMFA a yega di wak cu nan ta cuminsa cu un of dos proyecto di renobacion, y despues e sector priva ta stimula su mes pa inverti den renobacion.
 
Nan ta elogia e echo cu tin iniciativa priva cu ta invertiendo pa rescata edificio monumental  entre nan Brenchie’s y otro  mas manera Meta Group cu ta bay cuminsa drecha un edificio na Wilhelminastraat.  Directora di e fundacion aki ta bisa cu Monumentenfonds  tabata interesa den “Casa Rosada”;  pero na momento cu e sector priva ta cumpra cas pa restaura nan, e fundacion aki ta aplaudi e iniciativa aki. “Pasobra como fundacion nos no por haci tur cos. Nos meta no ta pa cumpra tur e monumentonan di Aruba. Nos no por y nos no kier.” 
P’esey locual nan ta mira riba Wilhelminastraat  ta un desaroyo hopi bon na e momento aki.
 
Stichting Monumentenfonds  ta inverti den proyectonan cu niun otro ta bay haci e tipo di inversion aki, manera nan a yega di haci cu Stadhuis, Contraloria General  y actualmente nan ta wak kico nan ta bay haci cu huize Veneranda.
 
Encuanto e edificio huize Veneranda recientemente studiantenan di hogeschool Rotterdam a traha riba un plan pa e monumento aki.  Nan a studia e edificio y e area y asina trece un idea con lo por haci uzo maximo di e edificio. Den e plan aki nan a trece ideanan con por adapta Wilhelminastraat treciendo mas bida y creando areanan mas berde cu sombra cu ta brinda tambe espacio pa mas actividadnan cultural.