Recientemente mediante un comunicado di prensa Minister di Transport, Integridad, Naturalesa y Asuntonan di Adulto Mayor, Ursell Arends, a informa cu el a reuni cu e directiva di Club Kibrahacha 60+ cu a bin entrega un rapport anual na e minister.

E rapport aki ta contene datonan manera cantidad di miembro, nan edad y con nan ta transporta nan mes na e club, y tur esaki a wordo comparti cu minister su team, como tambe kico nan retonan mas grandi ta.

Segun e minister ta indica parti di e motibo pa e dos partinan sinta cu otro ta pa explora con gobierno por yuda e instancia y con esaki por mehora e bienestar di e adultonan mayor en general.

 

Manera ta conoci Club Kibrahacha 60+ ta ocupa su mes cu actividadnan pa adultonan mayor y tin casi 300 miembro activo. Mayoria di nan programa, cu ta consisti di entre otro ehercicio fisico, manualidadnan y entretenimento, ta tuma luga na nan centro na Piedra Plat cu ta habri cinco dia pa siman cu actividadnan den mainta y atardi.

E club ta operando for di aña 1985 y ta fungi como un instancia importante pa combati diferente reto cu adultonan mayor den comunidad ta enfrenta manera entre otro isolacion, depresion y otro kebrantenan di salud.

Manera ta conoci aña pasa den luna di april Gobierno di Aruba conhuntamente cu e club a anuncia nan number telefonico special pa atende cu adultonan mayor den soledad. E mandatario a indica cu e liña telefonico aki, cu ta wordo carga door di boluntarionan, a mira un aumento den yamada diario desde cu e la cuminsa funciona.

Pa loke ta e metanan di e club, Minister Arends a splica cu un di e metanan cu e club su directiva tin pa aña 2024 ta aumenta e cantidad di miembro- y boluntarionan na e club. Cu ayudo di mas boluntario e club lo por habri tur dia den siman pa asina brinda mas atencion na nan miembronan.

El a agrega tambe cu lo purba di busca mas adultonan mayor di e districto di San Nicolas cu ta unda cu tin mas hende di e demografica aki ta biba.

Por ultimo Minister Arends a gradici Club Kibrahacha pa tur nan esfuersonan pa yuda e adultonan mayor den comunidad. “E trabou cu nan ta haci siguramente ta uno di gran balor pa nos comunidad henter y tambe ta uno cu no ta facil. Ministerio di Asuntonan di Adulto Mayor lo percura pa mantene un colaboracion di cerca cu e club pa asina por yega na e metanan comun,” el a finalisa.