Club Kibrahacha 60+ ta un centro cu ta ofrece diferente actividad y servicio na e grupo dinamico di 60+, pa asina conhuntamente traha riba un bida largo y saludabel. Durante un bishita di reportero di Bon Dia Aruba, nan a splica cu a pesar di a enfrenta hopi reto despues di e pandemia, toch nan a logra sigui brinda nan servicio y continua cu nan actividadnan pa nan clientenan.

Jeffrey Matos, director di Club Kibrahacha, ta splica cu desde aña pasa caba nan ta activo, a keda activo durante proceso di Covid, pero na 2022 awo a start hopi mas habri y flexibel pa cu e reglanan. “Esey a trece toch un crecemento back den e calidad di miembresia cu ta bin akinan, bo ta ripara cu hopi mas hende a cuminsa yega e aña aki,” segun Sr. Matos. Esaki na su turno ta haci cu e entusiasmo di nos grandinan tambe a subi back, despues di un temporada cu tabata toch basta confuso y poco espantoso durante pandemia.

Awor a cuminsa back cu nan eventonan, encuentronan y fiestanan, naturalmente tumando na cuenta tur cos cu ta regarda siguridad di cada persona. “E ta bayendo bon, nos a haci varios tayer di salud, lesnan di cuarta, cual nos a amplia durante e aña. Recientemente nos a caba di cera un convenio cu Club Roy 50+ caminda nos grandinan por bay eynan pa haci nan movecionnan di gym den mashin,” segun Sr. Matos ta splica. Esaki ta e tipo di cooperacion y samenwerking cu e organisacion Club Kibrahacha 60+ ta kere den dje, y cu kier sigui promove tambe pasobra e ta hopi importante.

E fundacion aki tin 37 aña di existencia, y si tuma nota na e ultimo Censo di 2020 segun Sr. Matos, unda cu tin mas o menos indicacion di 23 mil persona di 60+ cu tin na Aruba, e ta un porcentahe bastante halto den nos sociedad. “Eynan bo ta ripara cu e funcion y rol di nos fundacion ta bira mas y mas importante den comunidad, y e concepto di cual cu nos ta haciendo, manera treciendo hendenan cu transporte for di diferente bario, y purba di saca nan for di soledad. E ta un organisacion stabiel y bo ta mira cu tin un necesidad pa locual nos ta ofrece. ”

Awor cu tin mas flexibilidad pa haci actividadnan, ta riparabel cu hende tin mas entusiasmo anto a hasta haya varios miembronan nobo. Recientemente prome cu zomer a organisa un concierto di cuarta cu a bay hopi bon na e club mes, cu entusiasmo grandi y ta trece hopi animo. Remarcabel ta cu hopi di e hende hombernan ta gusta practica musica, unda cu eigenlijk tabata tin un limitacion pa hende homber na actividad social pa algun motibo of otro, mas tanto nan ta hunga domino pero masha poco bo ta haya nan den otro eventonan segun Sr. Matos. Pues esaki ta un señal hopi positivo di awor por cuminsa mira mas participacion por medio di e diferente otro tipo di actividadnan cu ta wordo haci awor.

Ora cu reportero di Bon Dia Aruba a drenta e propiedad pa haci entrevista, por nota mesora cu tin hopi bon atencion na e lugar, e ambiente ta uno calmo y rustig. Durante entrevista cu Kelsey Arends, beleidsmedewerker na Club Kibrahacha, tabata tin un grupo di cliente ta hunga domino, kende tabata mustra alegre di berdad. Kelsey ta un hoben cu ta haciendo hopi bon trabao ultimo tempo na Club Kibrahacha, siñando hopi y agregando su mesun conocemento pa asina engrandece e servicio brinda na clientenan, un hoben sigur cu hopi potencial.

Actualmente nan tin rond di 200 miembro activo, y pandemia sigur a afecta e situacion financiero di e fundacion bastante fuerte segun Sr. Matos. Nan tin cuater fuente di entrada, cual ta subsidio di gobierno – mas o menos 40% di subsidio di tur gastonan – ta haya un contribucion for di e miembronan, Rotary tambe ta yuda, y tambe fundraising. Tur cuater e entradanan aki a wordo afecta, anto esaki a purba di mara faha, adapta y sigui bay. E ta bay dura mas o menos tres aña pa por yega na un cierto nivel back segun Sr. Matos, pero hopi cos mester a pospone manera mantencion y corta riba algun cos, pero a pesar di tur cos nan a logra keda na laira.

Matos ta conclui cu: “Bo no por bay adapta e contribucion ni hisa e prijs, un caminda bo tin cu crea e entrada, kiermen locual cu nos a haci – no ta e forma pa continua cune si – pero nos a corta den gasto. Esaki ta djis retonan cu bo ta haya como cualkier organisacion y mi ta kere nos a deal cune na un manera positivo. Nos no a bay bati porta na gobierno of bisa cu nos ta stop operacion completo, mi ta kere nos tin un team hopi humilde akinan. E ta bay mas bien pa e pasion cu bo ta trahando, pa ken bo ta trahando. Esaki tabata loke nos a enfoca riba dje, nos no a enfoca riba si tin placa of no, nos a gewoon sigui traha. Nos a pasa door di dje y mi ta kere nos por sigui pasa door di dje como fundacion.”