Diadomingo mainta na Clinica di Dialisis a celebra 40 aña cu e prome pashent na Aruba a dialisa na Dr. Horacio Oduber Hospital, cu un exposicion di e historia y evolucion di tratamento di dialisis na Aruba. Awendia e Clinica di Dialisis a expande cu diferente tratamento di hemodialisis y un total di 23 stoel disponibel pa e pashentnan.

Meneer Jacco Vroegop, presidente di e hunta directivo di hospital, a haci entrega di reconocemento special na 4 persona clave 40 aña pasa, tempo cu e prome pashent a wordo dialisa na Aruba. Nan ta dr. Oswald Wever, cu no por tabata presente, y su yiu, Dr. Wicha Ponson-Wever a ricibi e reconocemento na su nomber; señora Annie van Lierop, señora Rita Delamare y señor Eddie van Nes. Hunto nan a forma e team cu 40 aña pasa a cuminsa cu e tratamento di dialisis na nos isla.

Durante e evento tambe nursenan di e Clinica di Dialisis a duna un splicacion di e mashin ultimo modelo cu ta usa actualmente pa brinda e pashentnan e tratamento necesario di dialisis. Y tambe a duna splicacion di e efectonan negativo cu diferente tipo di cuminda por tin pa nos salud.

Un di causanan mas grandi di problema di riñon ta diabetes. Disfuncionamento di pancreas ta ocasiona nivel demasiado halto di sucu den sanger y ta causa – no e unico – di presion halto di sanger. Cu tempo esaki ta hiba na daño di riñon, cu ta haci dialisis necesario pa e pashent sobrevivi. Segun un estudio haci pa Fundacion Diabetes Aruba (FDA), na Aruba e proporcion di adulto cu tin diabetes ta di 15% di e poblacion adulto (77.800), locual kiermen cu 11.600 adulto na Aruba ta sufri di diabetes. Segun un estudio cu Price Waterhouse Cooper a haci, 8.33% di persona na mundo ta sufri di diabetes, comparando e estudionan aki, Aruba tin un diferencia di 6.67% mas halto, poniendo Aruba entre e paisnan cu porcentahe di diabetes mas halto na mundo.

Segun un estudio di BMC Health Services, e frecuencia di enfermedad di riñon ta aumentando drasticamente rond mundo y e costo di tratamento di enfermedadnan cronico ta representa un menasa principal pa recursonan di atencion medico na mundo. Na 2008 tabatin aproximadamente 1.75 miyon pashent na mundo cu tabata ricibi tratamento di dialisis, di cual alrededor di 1.55 miyon (89%) tabata cu hemodialisis y aproximadamente 197.000 (11%) pashent tabata cu dialisis peritoneal (dialisis via uso di filtracion den abdomen).

E cantidad di pashent cu ta ricibi tratamento di dialisis ta creciendo rapidamente, cu un promedio anual global di 7%. E motibonan principal pa e tendencia aki ta enbehecimento universal, multimorbilidad (presencia di dos of mas enfermedad cronico den un persona), aumento di pashent cu ta haya tratamento pa enfermedad di riñon den etapa terminal y aumento di entrada di un poblacion di pashent mas jong pa tratamento na paisnan caminda acceso na e facilidadnan tabata anteriormente limita.

Enfermedad di riñon cronico y dialisis no ta solamente un problema medico, si no tambe economico. E tratamento di dialisis ta consumi hopi recurso ya cu e ekipo y e materialnan ta basta caro. Ademas, dialisis mester di basta participacion di e personal.