Ta tristo pa mira kico ta pasando cu San Nicolas bou di gobierno MEP-RAIZ y loke a tuma luga e siman aki, caminda a anuncia cu lo cera John Wesley College, ta confirma cu gabinete Wever Croes II no tin curason pa San Nicolas. Esaki e miembro di partido AVP, Clifford Heyliger a mustra durante di bishita di fraccion di AVP na e scol na San Nicolas, despues cu Minister di Enseñansa, Endy Croes, a anuncia e decision di gobierno pa cera e scol.

“E decision tuma pa gobierno, ta algo hopi tristo ya cu San Nicolas ta un luga hopi special y mi persona a nace y crece den e bario aki y tin un proverbio cu ta bisa: “mustra mi unda bo tesoronan y lo mi laga bo sa unda bo curason ta.”

Pues claramente tur hende por mira aki cu na San Nicolas e gobierno aki no tin ningun inversion y no tin balor pa nada di San Nicolas, pasobra nan curason no ta na San Nicolas. Si Gabinete Wever Croes tabatin curason pa San Nicolas, lo tin nan tesoronan na San Nicolas y esaki ta parti di historia ya cu cultura y historia ta bay hunto y mirando cu cultura despues di tempo ta bira nos historia, e ta bira algo hopi importante den bida di nos ciudadanonan.Nos como ser humano, nos ta conecta cu algo, cu emocionnan, cu pasado, cu famia, y esaki ta nos famia: San Nicolas. Pero si cada rato ta kita for di San Nicolas, e ora berdad e lo bira un ‘ghost town,’ pasobra e ora no tin ningun hende cu ta biba den e bario aki mas.

Si nos sa algo di Aruba, no ta cos cu nos no mester di menos scol. Al contrario tin mester di mas scol y nos tin un scol cu ta produciendo bon, produciendo enseñansa di calidad y por upgrade esaki y por haci mucho mas cune. Hiba dialogo; ban papia cu stakeholders, ban wak con nos por scapa e scol aki, mira kico nos por haci pa nos por haya un miho producto y miho oportunidad pa nos muchanan di San Nicolas. Pa otro trimester tur e muchanan cu ta atende e scol aki mester busca un caminda pa bay y ya caba e muchanan cu a drop out durante aña escolar pabou of unda cu ta na Aruba, tin dificultad pa haya un otro cupo na otro scolnan.

Awor gobierno ta bay haci e cantidad di klasnan menos y mi ta kere cu mester wak cosnan un tiki mas leu y tin cu stop di wak e buki, stop di wak bo rekensom, pensando cu ceramento di un scol gobierno lo spaar placa pero ningun hende sa kico gobierno ta haci cu e placa aki cu e ta kere el a spaar. Despues ta sali na cla cu gobierno ta hiba e placa cu el a spaar dor di cera e scol aki caminda nan curason berdaderamente ta, esta cerca ‘friends & family,’ y ta di lamenta cu tin cu bisa esaki pero cada biaha nos ta wak e desaroyonan aki.

Na bo frutanan cu bo ta cosecha bo ta haya sa ki tipo di mata bo a planta, y frutanan cu e gobierno aki ta haya no ta pa San Nicolas, y sigur no ta fruta pa Aruba tampoco, ya cu na Aruba den ultimo cinco aña, nos no a mira un desaroyo general grandi cu ta impacta bida di cada ciudadano na un manera positivo.

Gobierno ta keda sconde tras di e pandemia cu a pasa pero pueblo no ta mira ningun desaroyo, no ta wak ningun tipo di encurashamento di parti di gobierno pa cu pueblo y nos no ta mira ningun desaroyo positivo, nos ta wak nada kico ta sosodiendo den progreso di e pais aki,” Clifford Heyliger di partido AVP a declara.