Awor cu a wordo introduci e sistema di sticker pa controla e pago di impuesto di auto tin situacion cu den practica ta wordo presenta, un di nan tin di haber cu ponemento di sticker robes, ya sea cu e number cu ta aparece riba e recibo di pago no ta cuadra cu e number cu ta aparece riba e sticker.
Vocero di Servicio di Impuesto di Aruba (SIA) a trece e punto aki dilanti ya cu den practica ta sosode cu hopi cliente a pega e sticker na e banda robes, y te hasta nan ta haya cu e doño di e auto cu tin stuur wiel na banda drechi ta pega sticker na banda robes. “Esey no por!”, el a bisa.
El a declara cu e sticker mester wordo pega na banda drechi ariba e windshield, parti paden di e auto y e ta conta tambe pa e auto cu tin stuur wiel na banda drechi. E tin cu bay asina ya cu asina tambe a wordo hinca den e decreto ministerial cu minister di Finansa a saca na december ultimo y cu a duna bida legal na e sistema nobo di sticker.
Pago pa sticker nobo
Pero tambe den practica SIA ta bin ripara cu hopi cliente ta bin pidi sticker nobo pasobra nan a pega esey robes riba e windshield. Pero e problema ta wordo presenta ora cu nan ta cobra e cliente 30 florin pa traha un sticker nobo.
“Esey ta algo cu nos ta ripara mas y mas; y clientenan no ta keda contento ora cu nos ta cobra nan 30 florin pa sticker”, sra. Romano a declara.
Sinembargo el a aclaria cu esaki ta un punto cu SIA a anuncia di cuminsamento caba cu si sticker ta wordo pega robes of si e cliente ta perde nan of si e ta wordo horta, e ora ey e cliente por ricibi un nobo pero e tin cu paga 30 florin.
E regla aki tin cierto excepcion. El a splica cu unico momento cu SIA no ta cobra 30 florin pa e sticker nobo ta ora cu e auto ta wordo envolvi den un accidente. Sinembargo e cliente mester presenta cu un comprobante di polis cu ta demostra cu berdaderamente e auto tabata den un accidente. E ora ey e persona no mester paga 30 florin sino 3 pa 6 florin.
Benta di auto y sticker
Un pregunta cu SIA ta confronta constantemente di nan clientenan tin di haber: kico ta pasa cu su sticker si e ta bende su auto? Sra. Romano a bisa cu un caso asina e persona cu ta bende su auto mester kita su sticker ariba e windshield.
“Esey ta di dje, el a paga pe, y e doño nobo mes tin cu paga su belasting y e mes lo haya su sticker tambe ora cu ta paga su belasting”, el a bisa. Sra. Romano a bisa enfaticamente cu e doño bieu di e auto ta su responsabilidad di kita e sticker fei di e auto cu el a caba di bende y no laga e doño nobo di e auto bay cu e sticker.
E ta bisa acerca cu e persona cu ta bende su auto e mester kita e sticker y entrega na SIA. Aunke e sticker ta bay kibra, SIA ta pidi e cliente pa trece e sticker cerca nan pasobra sino nan ta bay cobra 30 florin pa un sticker nobo en bes di 3 of 6 florin.
Si e cliente ta bende su auto cu e number di auto, tambe e mester cumpli cu e compromiso di trece e sticker pa SIA. Ya cu e number di auto no por bay sin mas riba e auto cu a wordo bendi. Sino cu nan mester pasa na SIA pa haci e cambio of traspaso.
