ORANJESTAD – Manera conoci, e compania di telecomunicacion MIO tin te cu 30 di juni pa cumpli cu su pagonan atrasa di 14 miyon florin. Segun minister di Asuntonan Economico, teoreticamente clientenan no lo tin conexion di celular/internet mas si e compania no logra cumpli.

Den teoria, segun e mandatario Richard Arends ta splica, e clientenan no lo tin conexion mas di celular si e compania no cumpli pa diasabra awor. Nan ta mirando cu DTZ kico lo ta e miho manera pa haci esaki. “Mi no ta haya cu cliente mester sufri ora cu un compania no ta cumpli cu su obligacionnan. Nos ta mirando den ki forma por acomoda e clientenan nobo y ya caba mi mes a acerca Setar y Digicel tambe. Esaki pues pa cuminsa wak si den caso e revocacion di licencia wordo efectua, kico nan lo por haci.”
E minister ta laga sa cu nan ta mirando e posibilidadnan tecnico y logistico di con por pasa clientenan over den un transicion na otro compania.

MIO su banda
E compania ta nenga di duna comentario na prensa na momentonan aki. Sin embargo ta subraya cu lo ta forsa pa duna declaracion publico si of ora cu gobierno dicidi di tuma accion contra nan. Bon Dia Aruba a tuma contacto cu doño di e compania Benjamin Allen kende a responde nos cu den e ultimo shete aña MIO a haci tur cos den su poder pa ofrece un servicio extraordinario, y na un prijs rasonabel.
E ta comenta:”Manera un compania cu a lanta door di inversion Mericano, nos a sinti nos mes como bishitante na Aruba. Nos a tuma e hospitalidad cu nos a haya door di e pueblo di Aruba den consideracion. Pa e motibo aki, nos a dicidi respectivamente pa no duna comentario na momentonan aki cu tin tension politico, a pesar cu tin declaracionnan publico cu a wordo haci en cuestion cu nos compania. ”

6000 cliente
E ta sigui bisa nos cu nan lo ta forsa pa declara publicamente si of ora cu gobierno di Aruba dicidi di tuma accion contra e compania, cu tin mas o menos 6.000 cliente. “Pues na momentonan aki nos no lo ofrece ningun otro comentario incluyendo riba accionnan cu por perhudica e servicio di nos clientenan pa locual ta comunicacion, incluyendo comunicacion di emergencia. Nos ta spera cu nos posicion aki di respet pa e proceso politico den un pais stranhero por wordo respeta door di media. Tanten no wordo forsa, MIO lo continua di brinda servicio na pueblo di Aruba te na e miho di nos capacidad, y ofrece e prijsnan mas rasonabel riba e isla.”

Gobierno
Den e decreto, cu gobernador a firma y minister Richard Arends como e mandatario responsabel, pa hala aden e licencia di MIO, ta para cu tin te 30 di juni pa efectua e pago. Minister Arends: “Tur hende mester haya e mesun level playing field pa participa den un manera husto den comercio akinan na Aruba den economia. Den e caso aki nos tin tres compania cu ta brinda servicio di telefon celular aworaki; Setar, Digicil y MIO. Un di nan no ta cumpliendo ya pa algun aña caba. E no ta algo di awo, e ta procedura encamina for di aña pasa unda minister de Meza oficialmente a notifica MIO cu lo bay over na cuminsa e proceso aki.”
Monopolio
Nos a puntra minister Arends su comentario riba e leynan cu tin actualmente y si nan no ta duna otro compania di telecomunicacion chens mes pa por establece drechi. E leynan por ta hinca den forma di monopolio pa no duna otro compania chens mes pa brinda nan servicio na Aruba? Minister Arends ta contesta: “Ami ta trata cu e leynan stipula. MIO su punto ta cu nan ta un compania chikito y nan no por cumpli esey financieramente. Pero e tarifanan pa loke ta trata mobile service providers ta un suma fiho. Esey ta e costo di haci negoshi. Setar ni Digicel ta pag’e cu placer pero asina e ta. Mescos cu tarifa di impuesto ta stipula den un manera y e no ta bay na si bo ta gana mas of menos. Tin tarifanan fiha den un Landsbesluit hinca, y ta esey ta locual nos ta cobrando nan.”

Ley nobo despues di 100 aña
E ley di telecomunicacion cu nos tin ta uno di aña 1917.”E ta un tremendo ley cu a sobrevivi 100 aña cu tur e avancenan tecnologico cu tin.” Cu e ley aki segun e mandatario ta splica nos, lo hala aden e ley di telecomunicacion anto introduci un ley di comunicacion electronico. Esaki ta encera telefon, internet, cable , celular y cu ta pas mas na e era cu nos ta bibando aworaki segun e minister. E ta un ley cu ta bao discusion aworaki y ta trahando riba dje durante e ultimo cinco aña.