Despues cu oficina di impuesto su localidad na Savaneta a bira victima di ladronicia, ainda nan no a bin cla cu e trabou pa ofrece nan servicio na comunidad. Ya den pasado a presenta un situacion na Santa Cruz caminda pa motibo di ladronicia nan no por a sigui duna servicio.
Vocero di departamento di Impuesto, sra. Meverly Romano a declara na Bon Dia Aruba cu na e momento aki oficina di Gobierno na San Nicolas tambe ta cera, ya pa varios luna caba, pa motibo di ladronicia tambe. Te ainda e parti unda departamento di Impuesto ta ubica, no a wordo drecha y debi na esey nan no por brinda servicio na San Nicolas.
E ta lamenta e situacion aki ya cu Savaneta tambe, departamento di Impuesto a bira victima di ladronicia. Esaki ta causa cu tampoco nan no por a duna servicio den e ultimo dianan aki na Savaneta, unda siman pasa nan a confronta un situacion inespera, ya cu tabatin ladronicia di e tubonan di koper di nan sistema di airco den Oficina Auxilia di Gobierno na Savaneta.
Esaki a causa cu e parti unda departamento di Impuesto ta duna servicio a keda sin airco cu e consecuencia cu nan no por duna servicio. E empresa encarga cu e trabou aki a indica cu e trabou aki lo tuma dos dia, y cu ayera dialuna eventualmente e servicio aki por reestablece. Sinembargo ayera nan no tabata cla cu e trabou, pero departamento di Impuesto ta premira cu awe e servicio tan necesario na Savaneta ta wordo normalisa.
Ladronicia y siguridad
Esaki no ta prome caso cu sucursalnan di departamento di Impuesto ta bira victima di ladronicia cu ta afecta e servicio cu nan ta ofrece na comunidad. Sr. Romano a laga sa cu sin duda e tipo di acto aki ta afecta nan servicio y e expectativa di nan clientenan tambe. Na clientenan ta hopi y nan ta spera di por ricibi e servicio aki sea na Savaneta of na Santa Cruz of na cualkier di nan sucursal rond di nos isla.
“Aworaki e oficina di Gobierno na Savaneta ta hopi importante, debi cu San Nicolas ta cera, hopi cliente cu ta custumbra di bay San Nicolas, nan ta bin na Savaneta. Y aworaki nos tin Savaneta tambe cera, y esey ta causa cu e clientenan pa e parti di pariba no tin un oficina caminda nan por haci nan pago di belasting of entrega nan documentonan”, segun sra. Romano.
Pa loke ta trata e aspecto di trece mas siguridad den nan sucursalnan, sra. Romano a declara cu akinan ta trata di Oficina di Gobierno cu no ta cay bou encargo di departamento di Impuesto. “Kiermen e parti di siguridad no ta departamento di Impuesto ta regla esey”, el a bisa. Ta asina cu cada oficina di gobierno tin nan mes gerencia y nan mesun maneho caminda departamento di Impuesto ta haya un parti di e edificio pa por uza pa asina brinda e servicio na nan clientenan. Te cu ayera e oficina aki na San Nicolas ta cera pa motibo cu nan ta wardando pa e por wordo drecha.
E ta compronde tambe cu gerencia di oficina di Gobierno na San Nicolas ta atendiendo cu e instancianan concerni pa por drecha e edificio aki. Sra. Romano a indica cu pa nan ta importante cu tanten cu e edificio no ta na ordo, y cu nan ta den un situacion cu no por duna servicio optimal, dificilmente nan no por habri tampoco. Nan no por bay eynan y laga nan personal bay duna e servicio cu ta rekeri. Esaki ta e caso actual na Savaneta y San Nicolas, aunke na San Nicolas e ladronnan a haci mas daño. Mientras cu nan ta spera cu awe nan por continua cu e servicionan na Savaneta.
Servicio
Departamento di Impuesto ta hopi consciente di e necesidad cu ta existi cerca e pueblo di pariba di brug pa e situacion cu a presenta pa causa di e ladronicia cu a tuma luga. Pa tal motibo nan ta pidi nan clientenan un tiki di pasenshi, ya cu nan ta spera cu a lo menos pa awe si nan por continua cu nan servicio manera custumber na Savaneta.
Tanten e situacion aki ta wordo normalisa totalmente, e clientenan di pariba por haci uzo di e otro facilidadnan cu departamento di Impuesto tin, ya sea den nan oficina principal na Camacuri, edificio MFA na Noord, oficina di Gobierno na Paradera y tambe na Santa Cruz. E cuater localidad aki ta dunando servicio actualmente.
El a bisa cu nan tin basta cliente cu a cuminsa custumbra cu e facilidad di Noord cu a habri un par di luna pasa. Durante e ultimo luna aki e fluho di hende a aumenta, ya cu tabatin hende cu no tabata custumbra cun’e of por ta nan no tabata sa cu oficina di Impuesto ta dunando servicio na MFA-Noord, y esaki a haci cu e prome lunanan tabata hopi slow.
Pero aworaki e cliente a cuminsa custumbra cu e localidad aki, ya cu e servicio tambe ta basta rapido. Nan ta spera cu eventualmente otro luna di september nan ta bay cuminsa duna servicio den e edificio nobo MFA na Paradera. Unabes cu e edificio nobo di gobierno aki ta habri su porta oficialmente, departamento di Impuesto lo muda su oficina chikito cu nan ta aworaki na Paradera. E cambio aki lo ta beneficioso pa nan clientenan ya cu e localidad y espacio lo ta mucho mas miho y mas grandi. Despues si tin mas oficina di Gobierno cu ta keda cla, nan lo wordo ubica eynan.
