Clientenan mester tene na cuenta ta cu aunke e cobramento di boet di parti di SIA no lo wordo aplica e aña aki; toch e clientenan cu no a paga su number di auto lo ricibi un carta di cobransa adicional .

PR di Servicio di Impuesto di Aruba (SIA), Meverly Romano  a informa na Bon Dia Aruba di esaki. Y tambe cu actualmente directora di SIA ta papiando cu minister Angel Bermudez di Financia pa inform’e y bin cu consehonan riba den cual direccion nan ta bayendo. Esaki  despues cu a keda introduci un serie di cambio pa loke ta trata e ley di pago di  impuesto riba vehiculo di motor. Nan kier mantene e aña aki como un aña transitorio pa laga e clientenan custumbra cu e diferente cambio cu a keda introduci den e ley di pago di impuesto riba vehiculo di motor.

Cobransa adicional
Aworaki SIA ta den liberacion cu e minister en cuestion cu na momento cu SIA ta bay manda e cobransa adicional,  nan ta manda nan pero sin boet. Kiermen si un cliente no a paga pa ehempel 150 florin di  mita aña di  nan impuesto anual di 300 florin riba pago di number di auto, e por haya un cobransa adicional di 150 florin; pero te aworaki sin e boet di e otro 150 florin riba dje.  Pero otro aña e situacion lo ta otro, ya cu entrante 2018 e ta bay  ta normal. Tambe e deadline te cu 31 di januari pa paga number di auto ta bay ta normal. “Pa mantene flexibilidad y pa mantene cu e clientenan lo por custumbra cu esey a keda plania pa no impone e boet den e cobransa adicional”, segun sra. Romano.  Pero esaki no ta nifica  cu e clientenan no por haya un cobransa adicional; y e mester reacciona riba dje.  Ya cu e tin un luna pa pag’e y si e no ta cumpli, e cobransa ey ta habri e caminda pa SIA uza nan instrumentonan  legal cu tin pa cobra e placa ey, entre nan pone beslag riba e auto, etc..

E ta splica cu e ley awor ta duna SIA e instrumento legal di saca cobransa adicional y esaki lo  por sali cu un boet maximo di un 100%. E ta un cambio grandi den e ley aki cu a crea un impacto cerca nan clientenan, ya cu e boet of pago adicional ta nifica un cobransa adicional, y e cliente no ta custumbra cu esey.

Reclamonan
Sra. Romano ta bisa cu SIA no a subestima niun reclamo cu nan clientenan a haci tocante e cambionan aki; y nan lo tene nan na cuenta. Un di e reclamo tin di haber cu e falta di informacion na comunidad mas  tempran.  Ta pa motibo cu ora cu tin un proposicion di ley, e por keda trata den parlamento, pero e por keda sin wordo trata tambe, segun e. Te hasta ainda durante e tratamento den parlamento lo por bin cambio riba e proposicion di ley. “P’esey ta hopi prematuro pa departamento di Impuesto bay duna un informacion cu despues ta resulta cu kisas, e ni a wordo trata of no a bin cambio”.  E ta haya cu esaki lo por  trece un confusion mas grandi pa e clientenan, y esey nan a purba di evita tambe. Nan pensamento ta cu ora un ley nobo of cambio di ley ta tuma luga, nan ta informa nan clientenan despues di su aprobacion den parlamento.

Un di e puntonan mas importante tin di haber cu e cobransa adicional. E impacto tabata asina grandi cu e clientenan a cuminsa pensa cu mesora despues di e fecha di e deadline cu tabata prome dia  31 di januari y despues el a wordo cambia pa 15 di februari ultimo pasa, SIA lo  cuminsa saca cobransa adicional y impone e boet di 100%.  Esaki a ocasiona cu un  avalancha di hende a bay paga y a wordo forma e rijnan largo pafo di edificio di SIA na Camacuri y otro servicionan di caha den otro districtonan.