E siman aki Servicio di Impuesto di Aruba (SIA) a inicia su campaña anual di yenamento di formulario di declaracion di impuesto.
Relacionista Publico di SIA, Sra. Meverly Romano a declara na Bon Dia Aruba cu actualmente nan ta yudando totalmente gratis e clientenan cu tin mester di asistencia cu nan declaracion.
Campaña
E campaña aki ta tumando luga na YMCA San Nicolas y na SIA mes su oficina principal na Camacuri, for di 8or di mainta te cu 4or atardi non stop. E campaña aki lo sigui te cu dia 30 di november awor. El a bisa cu no mester di cita.
Sra. Romano a bisa cu nan personal di impuesto ta dispuesto pa yuda nan clientenan pa yena nan declaracion. “Esaki ta un declaracion hopi importante pa entrega”, el a bisa. Esun cu no ta entrega su declaracion di impuesto lo por confronta e situacion cu e inspector di impuesto mes ta bay fiha e entrada fiscal. E ta bay calcula un entrada pa e persona cu hopi biaha e no ta realistico. Mientras cu entregando e declaracion e ora e inspector ta fiha un cobransa cu ta realistico.
Esunnan cu tin yena nan formulario caba, tambe nan ta yuda e clientenan pa ricibi y stapel nan; y duna nan un comprobante di e entrega aki. Sra. Romano a laga sa cu entrega di declaracion di impuesto ta un compromiso legal cu nos mester cumpli cu ne. Pa esnan cu no a ricibi nan formulario di declaracion nan por pasa libremente na SIA su sede na Camacuri pa busca un duplicado.
Fecha di entrega
Pa loke ta trata e termino di entregamento e fecha legalmente pa entrega e declaracion ta dia 1 di december awor. Esnan cu no ta alcansa tin 6 luna mas di tempo automatico sin mester di solicita pa prolongacion di e termino. Sra. Romano a laga sa cu SIA ta keda mantene e maneho cu e clientenan cu ta entrega nan declaracion prome ta esunnan cu ta wordo procesa mas prome despues.
El a formula un invitacion pa nan clientenan cu mester di ayudo pa yena nan formulario di declaracion pa bay cerca nan den e orario stipula ariba. Nan ta bay controla si tur entrada di e clientenan pues nan ta yudando e clientenan cu ta pa ehempel un persona soltero; of personanan cu tin un salario te cu 75 mil florin bruto pa aña. Tambe esnan cu ta casa, SIA ta yuda nan pa parehanan si nan tin un entrada te cu 150 mi florin bruto pa aña. Nan ta yuda e pensionadonan y e otro clientenan cu tin mester di ayudo.
Ta importante pa e clientenan tin nan documentonan necesario pa compaña nan declaracion di impuesto, entre nan carta di interes, rapport di salario, rapport di pensioen, etc.. y tur otro comprobantenan acerca pa asina e declaracion ta completo.
Di otro banda, Sra. Romano a indica cu e mesun condicion cu nan tabatin añanan anterior tambe ta conta e aña aki. Kiermen cu nan no por yuda e clientenan cu ta traha riba nan mes of esunnan cu tin un empresa. Ya cu nan mester cumpli cu mas rekisitonan fiscal pa cumpli cu ne. Ta asina cu si nan mester di asistencia ta recomendabel pa nan mes busca un consehero.
