Insel Air tin algun luna ta pasando den problema financiero manera ta conoci caba. Suspension di vuelo pa otro destinacion nan den Caribe a tuma luga na januari 2017.  Esaki ta trece consecuencianan grandi pa clientenan cu tabata tin ticket cumpra caba, si nan no a wordo informa na tempo.

Ticket cumpra
Cliente J.Quandt ta informa Bon dia Aruba di su experencia cu Insel Air:  “ Mi a cumpra un ticket na 2016 unda Insel Air tabata tin un promocion pa su di 10 aña di anniversario. Mi a cumpra mi ticket pa biaha entre maart pa april 2017. Esaki tabata e possibilidad pa cu “Travel period” cu a bin cu e promocion. Mirando cu e fecha ta yegando mi a bai busca informacion dos siman prome cu e vuelo na oficina di Insel Air Aruba y loke mi a haya di contesta ta cu mi vuelo a wordo suspondi y awor mester tuma contacto cu Custumor Relations via mail. Te awo mi no haya niun yamada tocante mi ticket y si mi lo haya e placa bek. Esey ta mi preocupacion.”

Consecuencia di cancelacion
Bon Dia a tuma contacto cu e station manager di Insel Air Aruba. E compania ta bisa “tur cliente cu keho por pasa na nan oficina y haya mas informacion”. Experencia di Sra. Quandt ta mustra cu despues di keho na officina di Insel Air, ta haya un papel cu informacion ”consecuencia di suspension di vuelo” unda den e papel ta wordo informa cu por declara keho via E-mail. Siguiente ta haya un Case- Number y pronto lo tuma contact cu su persona. No ta wordo menciona cuanto tempo lo tuma pa haya un reaccion bek for di e compania.

Reaccion Insel
Mirando e problemanan actual cu ta andando cu Insel Air, ta conseha tur cliente pa investiga nan mes si tin vuelo ainda na tur destinacion nan pa asina ta prepara. Ainda no sa cuanto hende por ta den e mes un situacion cu Sra. Quandt. Bon Dia Aruba a puntra Stephan van Spaandonk, Chief Maintenance Officer pa un reaccion kende ta bisa cu: “Un solucion den casonan asina ta pa yuda e cliente haya un ticket cu un otro aerolinea of cualkier otro opcion cu ta riba mesa. Nos ta percura semper pa busca un solucion pa nos clientenan.” Si vuelonan ta wordo cancela, e responsabilidad di Insel Air ta pa sea haci un refund, of zorg pa e pasahero toch yega na su destinacion. Sr. Spaandonk ta bisa nos cu tur cos ta depende tambe na e situacion na e momento ey. “Tur cos ta depende na e destinacion, ki dia, cuanto tempo etc. Mi ta conseha tur hende cu nan vuelo a wordo cancela y nan tin ticket cumpra caba, pa bay oficina di ticket di Insel Air na aeropuerto y haya mas informacion eynan.