Clearview AI a pasa varios luna compilando su database di reconocemento di cara cu mas di 3 biyon di potret di hende cu a colecta for di internet. Awo ta enfrentando un demanda na Illinois pa tuma e potretnan aki sin permiso di nan doño.

American Civil Liberties Union a anuncia diahuebs cu ta demandando e compania controversial di reconocemento di cara. Co-demandante ta Illinois State Public Interest Research Group y e Chicago Alliance Against Sexual Exploitation.

Clearview AI a ser forsa den luz publico despues di un perfil di New York Times na januari, detayando con e compania tabatin plan di usa reconocemento di cara pa identifica hende en bibo. Por haci esaki a traves di su database enorme di potret di hende, cu a compila riba plataforma di rednan social manera Instagram, YouTube y LinkedIn, sin permiso di e hendenan aki.

Ta treciendo e demanda na Illinois pasobra ta e unico estado na Merca cu un ley di privacidad biometrico, e Biometric Information Privacy Act. E ley ta rekeri companianan pa tin ‘permiso informa por escrito’ prome cu compila y usa biometrica di un persona, incluyendo reconocemento di cara. Na januari, Facebook a paga un acuerdo di $550 miyon mara na e ley.

ACLU a bisa cu ta demandando Clearview AI den nomber di organisacionnan cu ta representa sobreviviente di abuso sexual y violencia domestico, como tambe inmigrantenan indocumenta. A bisa cu e tecnologia ofreci pa Clearview AI por permiti partner abusivo y agencianan gubernamental pa track y enfoca riba comunidadnan vulnerabel.

Documentonan obteni pa Buzzfeed News a mustra cu polis tabata usando Clearview AI pa identifica prostituta. Tambe cu tabata ofrece su tecnologia di reconocemento facial na ICE, como tambe companianan priva manera Walmart.

ACLU ta trahando cu bufete legal Edelson PC, cu tambe tabata involucra den e demanda di Facebook resolvi na januari. E demanda ta pidi pa un orden di corte na Illinios pa forsa Clearview AI elimina potret di residente di Illinois compila sin permiso, y stop di compila potret nobo te cu cumpli cu ley estatal.

Si e demanda ta exitoso, e proteccion aki lo aplica unicamente na residentenan di Illinois, ya cu otro estadonan no tin ley di biometrica.

Companianan manera Facebook, Microsoft y Google a manda carta exigiendo Clearview AI stop di compila imagen for di nan plataforma. CEO di e compania, Hoan Ton-That a argumenta cu tin derecho segun Prome Amienda pa compila e imagennan.

“Si permiti, Clearview lo destrui nos derecho na anonimato y privacidad – y e seguridad cu ta bin di ambos”, ACLU a bisa. “Hende por cambia nan nomber y adres pa sconde nan ubicacion y identidad di hende cu kier haci nan daño, pero no por sconde nan cara.”