Claridad financiero ta clave pa eleccion

Situacion financiero di gobierno lo bay hunga un papel importante den e ultimo simannan di campaña. Pa mita di luna di augustus gobierno lo mester a entrega na CAft, y tambe na parlamento, e rapport tocante prestacion financiero den e di dos kwartaal di e aña aki. Sin duda algun tanto den e partido den gobierno, como den oposicion ta anticipando e salida di e documento aki, cu ‘al pie de la letra’ di e ley encuanto CAft, nan lo mester a haya algun dia pasa caba. E ley ta stipula cu seis siman despues di clausura di e kwartaal, gobierno mester haci entrega di esaki. Dentro di dos siman despues por spera e reaccion di e cuerpo supervisor aki.

Pero, kico realmente ta e expectativanan na e momento aki? Y kico ta conoci caba di e rumbo economico y financiero den cual nos ta bayendo? Te na e momento aki ta dispone di e cifranan di entrada di gobierno pa e prome cuatro lunanan di aña. Di esakinan nos por destila cu e entradanan ta kedando atras, den comparacion cu e mesun periodo di 2016. Entrada total di e periodo tabata Afl. 337.6 miyon na 2017, compara cu Afl. 366.3 miyon na 2016. Pa loke ta entrada di impuesto, esaki tabata Afl. 298.1 miyon, compara cu Afl. 332.2 miyon na 2016. Den entrada total anto tabatin un caida di Afl. 28.7 miyon, mientras e caida den entrada di impuesto tabata no menos cu Afl. 34.1 miyon.

Naturalmente den esaki mester tene cuenta cu e caracteristicanan di cobranza di impuesto, cu ta influencia e entradanan den cierto parti di aña. Por ehemplo e parti grandi di impuesto riba ganashi lo mester a drenta na luna di mei, ya cu pa 31 di mei tur empresa mester a haci aangifte y paga di biaha loke nan debe na winstbelasting riba aña anterior. En todo caso den e categoria aki e entradanan a keda leu atras compara cu aña pasa: na 2016 a cobra Afl. 60.4 miyon, mientras cu e aña aki e categoria aki a trece te awor solamente Afl. 11 miyon aden. Interesante pa haya sa con e comportacion di e impuesto aki ta, ya cu e ta un indicador clave pa actividad economico rendabel durante 2016. Di e publicacionnan di Banco Central nos por a observa caba cu mescos cu 2015, aña pasa a trece nos un caida economico, di -0,9% den termino nominal di GDP.

Otro indicadornan importante ta e comportacion di impuesto riba salario, impuesto di importacion, y BBO. Den esaki nos ta mira un mehoracion den tur tres categoria e aña aki, compara cu aña pasa. Loonbelasting a aumenta cu 4,6%, impuesto di importacion cu 4,4%, y BBO cu 10%. Aunke esaki ta un indicacion di un posibel mehoracion economico, mester mustra riba e comentarionan di CAft y SVb por ehemplo, cu ta indica cu e mehoracion di entrada ta basa riba cobransa mas riguroso, y no riba mehoracion di condicionnan economico. Esaki na su turno ta cuadra cu e resultado menos faborabel di e encuesta reciente entre consumidor di Banco Central. Mientras cu e aumento di GDP pa e aña aki ta basa riba e inicio di rehabilitacion na comienso di juli. Ta birando fin di augustus y no t mirando mucho movemento den e refineria y tampoco a bira conoci cualkier empleo mas masivo, sigur no bao trahadonan local. Por cierto cu den entrevista cu Bon Dia 24 na e evento di promocion laboral e fin di siman cu a pasa, por a mira y scucha entrevista cu e vocero di recurso humano di Citgo, cu a confirma cu e manera pa solicita pa trabao na Citgo, ta via e website di e compania, unda tin un pagina special pa Aruba, y por contempla e cuponan actualmente disponibel. Riba pregunta di e reportero el a afirma cu actualmente tin 45 puesto pa cual nan ta buscando personal… No ta parce nos un cantidad impresionante y prueba cu cos no ta andando cu gran velocidad. E pregunta grandi tambe ta, unda e famoso ’Citgo desk’ di gobierno a keda? Por ta cu e servicio special ey a muri cu e invasionnan hudicial na maart? Te awe en todo caso, no por a duna ningun hende un indicacion unda nan mester ta pa haya trabao na Citgo. Ta bon pa e trahadonan local sa cu ta solamente via internet nan por solicita, y esun cu tin problema cu esey, ta su problema… Un contraste grandi cu e gran buya cu a haci dia di instala e servicio di registracion aki, cu acceso pa esunnan interesa, cu awor por cuminsa conclui cu henter e desk no tabata nada mas cu propaganda politico?

Tambe nos ta nota cierto reserva cerca e partidonan politico, no tur, pa referi na e situacion di e refineria. Esey lo ta un eror grandi, pasobra mientras tanto na San Nicolas bao pueblo mes tambe ta creciendo e realisacion, cu por lo pronto nada ta sucede, loke ta politicamente no solamente interesante, sino clave pasobra henter e ‘luchtkasteel’ economico di e partido berde ta basa riba esaki.