Mediante un post riba rednan social, lo cual ta e tendencia awendia pa haci un denuncia tambe, un ciudadano a publica varios potret di un caminda na Santa Cruz yen di sushi, vooral blekinan di verf scondi den un mondi.

Den e publicacion, a splica cu “a duel mi hopi mi ta post e cos ki na papiamento, nos ta un grupo non traditional cu ta hike via luga nan cu no tin trails, dus nos ta bay cu machete kap mata y traha nos mesun ruta, gewoon cana deep den nos naturalesa di Aruba. Nos ta echt letterlijk explora Aruba unda hende normalmente no sa yega mes, y no sa mes cu ta existente.”

Igualmente a señala cu “awe nos a bin topa esaki, deep den Mondi den Santa Cruz. Mi tin hopi potret saca pero ta haci hopi dolor pa saca nan.”

Den un post cu a haya basta reaccion y shares, otro ciudadanonan no a tarda pa duna nan comentario como por ehemplo: “City Inspector mester di mas hende pa combati e problema cu tin na Aruba, nan ta trahando hopi duro mi sa, pero problema di sushi ta un cacho di caya.”

Manera potretnan ta ilustra, ta trata di sushi unda tin basta blekinan di verf y partinan di auto, den otro reaccion a comenta cu “banda di e dam di Moko tur ora nan ta benta tur sorto di sushi banda di e caminda te hasta corchon di cama! Mester crea un forma pa gara e hende nan cu ta haci esaki y duna nan un multa hopi pisa pa susha nos naturalesa.”

“Cos ki ta straño si con e sushi a yega eynan. Ta deep den mondi segun mi por a lesa. Auto of un truck, etc., no por yega eynan. Kisas ta gradualmente ta hiba e bleki nan eynan segun ta ruimop cu garoshi kisas? En todo caso, hopi tristo mes. Mester haci un investigacion asap.” Un otro usuario di red social a comenta.

Minister di Naturalesa su reaccion
 E post a bay viral basta lihe cu te hasta a yega cerca e minister concerni, Ursell Arends ken a reacciona mesora y splica: “E parti mas tristo ta cu nan por a easily warda pa Baki den Bario y trece awe. Pero esaki claramente ta un negoshi y lo avisa Bureau City Inspector pa atende cu esaki y busca any evidence. Nos tur por ta di acuerdo cu mas boet mester cay pa esnan cu no ta stima nan pais y ta haci e decision consciente pa susha nos Aruba. Tin cu remarca cu nos a haya un APV sin richtlijnen, none the less DNM ta trahando riba esaki. Ta aprecia e comunidad pa raporta cualkier ilegal dumps, cu video of imagen di hende haciendo esaki…raporta via fixi.aw.”

17 di januari ultimo, minister Arends a informa cu diabierna 12 di januari nan a reuni cu Bureau City Inspector unda nan a informa ariba e diferente accion di limpiesa cu nan tabata tin y cu nan tin den plannan. Nan ta bin haciendo nan trabounan for di comienso di aña na varios caminda y BCI ta bay keda monitor esaki mirando cu un dia despues cu a haci limpi, a bin constata cu hende a bolbe laga sushi atras.

“Un tristo realidad pa mira con nos hendenan bibando riba nos dushi Aruba ta dicidi pa actua,” minister Arends a sigura.

Un di e sugerencia cu a bin dilanti durante e reunion di diabierna tabata pa pone camara na e luganan cu ciudadanonan ta haci e acto contra ley aki pa asina BCI y otro departamentonan di Gobierno di Aruba por actua riba esaki, cu tur e consecuencia cu lo bin pa e ciudadano cu a comete e acto contra ley.

Sigur un sugerencia cu di aña pasa a bin ta evalua, no solamente e localidadnan pero e logistica pa por bin cu un structura adecua pa e control.

“Mantene Aruba limpi no ta solamente Gobierno di Aruba su deber, sino tambe un responsabilidad comparti cu tur ciudadano. E decision pa susha e pais cu bo ta biba ariba ta bin back na e persona su mesun balor y normanan y nos lo keda enfatisa ariba esaki.”

Caminda di tira sushi tin, e decision pa responsabilisa pa e desperdicio cu cada ciudadano ta produci ta keda den man di e ciudadano, nan tambe a menciona cu Baki den Bario 2023 tabata na tur districto y nan ta keda haci un yamada na pueblo pa informa nan mes unda e persona/compania cu ta contrata pa deshaci di desperdicio ta deposita esaki, percura pa esaki no termina den naturalesa.

FIXI tambe por yuda
 E plataforma cu a ser crea na 2022 pa atende cu reto di desperdicio yama “FIXI” ta un aplicacion hopi facil pa usa, e ta “user-friendly” y ta empodera ciudadanonan cu mira algo cu ta robes pa nan por raporta esaki y tin e confiansa cu e reportahe ta yega na e instancia concerni.

Proceso di raporta ta facil:

1) Observa un situacion 2) Saca potret 3) Skirbi reportahe cortico di e situacion 4) Manda e reportahe 5) BCI ta ricibi y redirigi pa instancia concerni si ta necesario.

Si ta observa cualkier di lo siguiente, lo bo por raporta esaki cu Fixi:

• Dump ilegal of hende ta deshaci di sushi ilegalmente.

• Ta deshaci awa preto riba tereno publico of den dam.

• Hende ta deshaci di kimico riba tereno publico.

• Ta sospecha individual of compania di deshaci di kimico peligroso (venenoso) riba tereno publico, of riba tereno priva sin tin permiso.

• Wacharaca di auto riba tereno publico.

Nota di redaccion: Potretnan ta cortesia di un ciudadano mes cu a publica e situacion aki riba Facebook.