Algun ciudadanonan cu ta uza Linear Park entre otro pa cana y train den oranan di anochi ta remarca na Bon Dia Aruba cu ta haci falta di iluminacion na cierto areanan.
Linear Park y parkenan similar aworaki ta treciendo un bista nobo na cierto areanan di Aruba cual hopi ciudadano ta basta contento di dje. Bon Dia Aruba a combersa cu algun usuario di Linear Park pa scucha for di nan kico nan ta pensa di e desaroyonan nobo aki manera Linear Park y si ta haya cu ta haci falta di algun cos. “Tin algun partinan cu ta scur anto bo no sa nunca ken por gara bo di sorpresa eybanda,” un ciudadano ta comenta. E partinan cu ta wordo referi na dje ta mas tanto bayendo direccion di Wilhemina Park ora cu bo ta bini for di Nikky Beach na e partinan cant’i lama como tambe algun area bayendo direccion di aeropuerto. Un dama ta bisa Bon Dia Aruba cu un biaha el a wordo recomenda pa e preferiblemente no cana su so anto pa e tin un otro persona hunto cu ne pasobra tin biaha sa hasta mira adictonan ambulante den e area ta haci fastioso.
Mantencion di Linear Park
Den combersacion cu director di DOW algun siman atras, e ta splica Bon Dia Aruba cu e miho organisacion cu e capacidad pa haci e trabaonan di mantencion na Linear Park ta DOW. DOW ta encarga cu e mantencion riba e luznan, e matanan , percura pa e klinkersnan ta bon, como tambe e elemento nobo cu a bin acerca cual ta e makinaria pa train. Segun director di DOW, Marlon Croes, e makinaria pa train ta uno cu ta rekeri un otro tipo di mantencion pasobra esaki ta mas mecanico.
Segun sr. Croes, ora cu e trabao manera e proyecto Linear Park ta termina, e ta wordo controla prome cu e ‘oplevering’ tuma luga of e trayecto di e proyecto total di e contratista, pero naturalmente tin mas trabao pa haci despues. E ta splica cu: ”Por ehempel un caminda di klinker, ta un of dos bes den un aña bo ta bay wak e anto e matanan periodicamente bo mester revisa esakinan. E mashinnan di train ta un otro elemento cu nos a ‘stem e af’ cu por ehempel un bes pa luna nos ta check si esakinan ta oke.” Tambe ta kita salpeter for di e ‘water pressure’ pa esakinan no frustia. Un di e makinarianan di train ya caba a kibra cual a wordo kita mesora pa e siguridad di e usuarionan. Esaki segun sr. Croes ta bay wordo drecha anto lo wordo poni bek pronto.
Pa locual ta e matanan di Kwihi tambe por ehempel, na Aruba tin diferente areanan cu e matanan aki ta creciendo hopi lihe y esaki ta pasando na Linear Park tambe. Esaki ta trece cu ne cu e ciclo cu DOW ta pasa pa corta e matanan mester awo bira mas cortico segun Sr. Croes. “Aworaki e matanan ta hayando mas awa y ta creciendo mas lihe y pa e cosnan aki entre otro nos mester pone mas manpower pa mantene nan.” Den general, e impresion cu Bon Dia Aruba a haya di varios ciudadano ta cu nan ta hopi contento y algun te hasta orguyoso di mira con e proyectonan aki ta realisando. Bon Dia Aruba ta bay busca un reaccion cu DOW riba e falta di iluminacion na algun area mirando cu tog esaki ta keda un preocupacion di algun di e usuarionan.
