No ta un secreto cu costo di bida a aumenta drasticamente den ultimo lunanan. Despues di e crisis di pandemia di COVID-19 hopi hende a perde trabao, hopi famia a cay den situacionnan grave inespera y e proceso di recuperacion pa algun ta mas dificil cu pa otro. Reportero di Bon Dia Aruba a acerca algun ciudadano pa puntra con e situacion economico dificil a afecta nan celebracion di Pasco e aña aki.
Sra. Sirley Bolivar a conta reportero di Bon Dia Aruba cu e aña aki e celebracion di Pasco tabata keto pe y su casa compara cu añanan anterior. “E aña aki nos no a haci gran cos. Normalmente tur aña nos ta invita famia y amigonan, nos ta cumpra ayaca, ham di Pasco, pan de jamon, tur e cuminda dushi di Pasco y pasa un rato den famia y amistadnan. Pero e biaha aki, nos no por a haci esey,” el a indica.
El a enfatisa cu e gasto cu nan a yega di haci añanan anterior durante Pasco, e aña aki tabata mas cu dobel, compara cu e otro añanan y pues tabata casi imposibel pa realisa mirando e situacion economico dificil.
“Tur aña nos ta inverti pa cumpra regalo pa e muchanan, cumpra decoracion, kertsboom, pero ya e aña aki, a pesar cu nos a logra cumpra algun cos, pasobra danki na Dios nos ta bendiciona, nos no a haci nada compara cu otro añanan,” Bolivar a comenta.
Maria Molina tambe a expresa cu e situacion dificil tabatin un efecto grandi ariba e celebracionnan e aña aki. “E situacion a afecta nos expectativanan pa e celebracionnan di e aña aki. Por ehempel aña pasa tabata dificil, pero toch nos a logra sikiera traha ayaca. E aña aki nos no a traha ayaca pasobra e gasto ta hopi grandi. Tur cos ta djis extremadamente caro,” el a remarca.
El a agrega cu nan haci esfuerso pa cumpra regalo, paña, sapato pa e muchanan, pero pa nan mes como mayor, nan opta pa no haci e gasto extra ey pasobra e situacion ta keda hopi preta. “Pa nos como mayor ta importante pa e muchanan ta feliz, pa nan disfruta di e Pasco, pero pa nos grandi nos no a inverti den paña di nada di esey. E situacion ta fuerte y pa esnan cu ta cobra trempan mester warda te fin di januari pa cobra atrobe.”
Sr. Jose Medina, pensionado, a conta cu pe como pensionado e situacion ta hopi fuerte. “Mi pensioen no ta yega pa casi nada, solamente pa gastonan basico y di baina. Mi ta purba di busca algun trabao chikito aki aya pa gana algo extra, pero e ta dificil. E aña aki mi no a haci nada pasobra no tin suficiente entrada pa celebra.”
