Ciudadanonan preocupa pa situacion actual di COVID-19

Casonan di COVID-19 na Aruba a aumenta drasticamente y ayera caba e cantidad di casonan positivo a surpasa 1,500 caso activo. Weekend di celebracion di fin di aña ta den porta y e posibilidad cu por implementa medidanan mas estricto, y hasta toque de queda, pa e fin di siman di cambio di aña ta halto.

Bon Dia Aruba a combersa cu varios ciudadano cu a expresa nan opinion y preocupacion pa e situacion actual cu e pandemia di COVID-19 na Aruba.

Den un comunicado di prensa ayera, DVG a informa cu Aruba a registra un record di 439 caso positivo di Covid-19 riba un solo dia, cu a pone cu e total di casonan activo a yega 1,506. Aunke cu e casonan a aumenta drasticamente, mester remarca cu e cantidad di persona interna na hospital ta abao: solamente seis persona interna ariba piso general y cero den ICU.

Rond di mundo tambe e situacion ta escalando y e casonan di Covid-19 ta hopi halto. E variante nobo, Omicron, ya ta presente na hopi pais y na Hulanda mes ya caba a decreta un lockdown pa motibo di e cantidad di caso y e presencia di Omicron na e pais.

Sr. Reymundo Sneek, ciudadano Arubiano, a indica cu den su opinion lockdown ta kibra moral di hende y esaki tin como resultado cu e trabao pa psicologonan ta bira hopi mas. El a indica tambe cu e ta haya straño cu e casonan a subi exponencialmente diripiente y e ta señala cu e mes tin duda di e cifranan cu DVG ta duna.

“Aruba tabata habri y e casonan no a subi asina lihe, kiermen nan cifranan mes ta pone mi duda, pasobra antes nunca e cifranan no a subi exponencialmente asina”, el a indica.

Sr. Sneek tambe ta subraya cu segun informacion cu su mes a mira ariba noticianan internacional, e variante Omicron no ta mesun peligroso cu Delta, y esaki, e ta menciona, e por ripara tambe door di e cantidad di personanan cu tin na hospital actualmente. “Si ta Omicron, di loke mi por a wak ariba noticianan, ni sa bo no sa cu bo tine pasobra e ta asina suave. Kiermen e no ta asina peligroso”, el a bisa.

El a enfatisa cu, den su opinion, lockdown of vacuna no ta e solucion pa sali di e pandemia. “Ken a prueba esey? E mesun mundo cu a bin cu tur sorto di medida cu a mustra cu ningun ta traha. Si vacuna tabata e solucion henter mundo tabata cla y e no ta asina. Si bo wak e cifranan di vacunacion bo ta bisa net vacuna no ta e solucion. Bo no por tin un vacuna pa bringa un variante si e variante no a sali ainda”, Sr. Sneek ta señala.

Un otro ciudadano preocupa pa e situacion, Sra. Maria Molina, a expresa cu e pandemia di Covid-19 a trece un cambio drastico den nos comunidad, den nos custumbernan y el a trece cambionan hopi significativo. E ta señala tambe cu economia a sufri a hopi y hopi hende a perde nan trabao, comerciantenan chikito a perde nan negoshi, y apart di esey el a mira tambe cu hopi hende a keda sin un hogar pa motibo di e situacion financiero cu e pandemia a ocasiona.

“Mi ta pensa cu si nan bolbe cera frontera, si nan bolbe pone toque de queda, locual nos a biba caba aña pasa, Aruba no lo por soporta esey un biaha mas. Si prome e tabata un desaster, aworaki e lo ta catastrofico. Nos no lo recupera ni emocionalmente ni economicamente”, el a indica.

Pa locual ta trata e aumento drastico di casonan positivo, Sra. Molina ta comenta cu Covid ta un enfermedad cu a bay cu hopi hende, hopi famia a perde nan sernan keri y e ta enfatisa cu e unico cos cu ta resta ta pa tur hende pone di nan banda.

“Nos mester cuida nos mes, usa e tapaboca, desinfecta nos man, no anda den aglomeracion, mantene distancia di otro. E ta den nos man pa cuida nos mes pasobra si nos no cuida nos mes ningun otro hende ta bay cuida nos. E ta pa nos mesun bon. Tuma consenshi y cuida bo mes”,el a finalisa.

Sr. Reison Alvarado, comerciante chikito, doño di su mesun negoshi di electricidad y construccion a splica cu e pandemia a pone hopi obstaculo y desafio pa su persona como comerciante. E posibilidad di un toque de queda of lockdown pa motibo di e aumento drastico di casonan positivo ta hopi preocupante.

“E situacion no ta nada fasil. Mi mes a pasa dos te hasta tres siman largo sin ricibi ni un yamada of mensahe pa un trabao. Si bin cu medidanan estricto atrobe, e golpi lo ta mas duro pasobra ya caba e situacion financiero ta dificil, cu un golpi asina e por bira pio y ta nos e comerciantenan chikito ta sufri mas”, el a indica.

E posibilidad cu lo por pone toque de queda pa e weekend aki, den su opinion, no ta husto. “E ta un tradicion na Aruba cu cambio di aña ta wordo celebra grandemente den famia y tin hende ta sali bishita otro famianan despues di tiro. E no ta husto cu gobierno ta prohibi nos di celebra den famia of sali bishita otro famianan despues di tiro, cual ta un custumber pa hopi hende”, Sr. Alvarado a expresa.