E siman aki Aruba a conoce un otro aumento den prijs di gasolin cu 15.3 cent. Un noticia cu a ocasiona disgusto grandi den comunidad, mirando cu pa algun tempo caba prijs di gasolin ta conoce aumento tras di aumento, mientras cu e situacion financiero di hopi ciudadano na Aruba ta precario.

Desde comienso di e pandemia Aruba tin retonan grandi financieramente. Hopi a perde trabao y hopi ta trahando mientras ainda nan ta entrega algun porcentahe di nan salario. E aumento den prijs di gasolin ta pone un peso adicional pa hopi hende y tin efectonan grandi ariba e situacion financiero fin di luna.

Bon Dia Aruba a combersa cu algun ciudadano preocupa tocante e situacion y e aumento di prijs di gasolin, cu lo por tin efectonan grandi pa nan.

Sra. Esther Medina ta bisa Bon Dia Aruba cu e situacion ta hopi malo p’e personalmente. E ta biba na Boroncana, Palm Beach, ta traha na Playa y aparte di esey e ta move hopi rond pa atende diferente actividadnan cu e ta participa den dje.

“Mi ta un señora grandi, mi ta biba mi so y mi ta traha part-time haciendo limpiesa. Mi ta ricibi pensioen, pero esey no ta hopi tampoco y mi tin gastonan personal, cuminda, coriente, awa etc. Aworaki gasolin ta hopi caro, antes mi tabata yena 25 florin y e tabata dura mi cuater dia. Aworaki 25 florin no ta dura mi ni dos dia tin biaha, depende con hopi mi ta core cu e auto”, Sra. Medina a splica.

Pa loke ta trata con esaki lo por afecta su situacion financiero, el a bisa cu e efecto cu esaki lo tin p’e ta hopi grave. “Manera mi a menciona caba, mi ta traha part-time y e ingreso aworaki casi no ta yega pa paga tur mi gastonan. Por ehempel mi mester a cancela mi contract di telefon pa motibo cu placa no ta yega pa cubri tur gasto y tin otro cosnan cu tin un poco mas prioridad fin di luna. Mi a pasa over na carchi normal di telefon cu ora cu mi tin disponibilidad mi ta cumpra carchi y pone internet na mi telefon.”

El a agrega cu si situacion sigui asina e lo bira practicamente imposibel pa core auto. “Mi lo mester cumpra un bais pa mi core, of busca un paraplu pa proteha mi di solo ora mi cana pasobra si cos sigui asina, mi no por bay core auto mas pasobra gasolin no ta yega pa nada”, el a agrega.

Sr. David Alvarado ta traha ariba caya, e ta usa su auto diariamente pa e por move y cumpli cu su trabao. E ta bisa cu e efecto di e subida di e prijs di gasolin ta hopi duro y e ta un gasto cu ta traha un buraco den su presupuesto di luna.

“Ami ta traha riba caya y mi ta depende di mi auto pa mi por traha. E subida di prijs di gasolin ta djis un golpi duro pa e cartera, pasobra antes mi por a yena mi auto full tank y core trankil pa cinco dia, of mas, dependiendo di unda mi ta bay y mi por a traha un presupuesto rasonabel y tin bon bista riba mi gastonan. Pero aworaki un full tank ta pasa 100 florin trankil y si e dura mi cinco dia mi tin suerte”, el a splica.

Manera hopi otro hende, Sr. Alvarado a bisa cu e ta sinti cu e situacion ta birando cada dia pio y cu e costo di bida na Aruba ta birando demasiado halto. “Ami no sa con nos ta bay haci aki un par di luna. Si tur cos keda subi asina y salarionan keda mescos, ta con nos ta bay haci? E placa no ta bay yega. Y nan kier bin cu mas impuesto, mas cobramento, pero pueblo no tin placa”, el a agrega.

Sra. Claudia Campo ta conta Bon Dia Aruba cu aumento di gasolin tin efecto grandi riba e presupuesto di dje y su famia. “Gasolin a subi hopi y e ta subi so y no ta baha. Pa mi e ta fastioso pasobra ami ta core un auto grandi cu ya caba ta gasta hopi gasolin y mi ta core hopi rond tambe pasobra mi ta hiba mi yiunan tur caminda, scol, bijles, futbol etc.”, el a bisa

Di otro banda, Sra. Campo a indica tambe, cu no ta solamente e efecto di aumento di gasolin ta dal duro, pero tur caminda prijsnan ta subiendo y esaki e ta sinitie hopi tambe na momento di haci compras di cuminda pe y su famia.

“Antes nos por a haci un bon compras pa mi y mi famia cu 500 florin, pero aworaki ya esey ta algo cu no ta posibel mas. Si mi bay cumpra por ehempel cuater cos na supermercado aworaki mi por gasta 30 florin of mas, dependiendo ki mi ta cumpra. E situacion ta grave”, el a agrega.