E dia mas anticipa pa Merca a yega, esta eleccion presidencial!
Bon Dia Aruba a aserca varios ciudadano Mericano cu ta residencia riba nos Isla pa asina haya un idea con nan ta mira e dia di eleccion di awe. E comentario cu mas a resalta ta cu tur ta di pensamento cu e candidato Hillary Clinton lo ta e triunfante. Mester bisa si cu e sentimentonan tabata mixto, ja cu algun a usa e palabra ‘unfortunately’ (lastimamente) y por a scucha den e tono di nan voz cu nan no ta masha contento cu esaki. Di otro banda tambe por a sinti un alegria di algun persona, cu a bisa cu hamas nan lo acepta un persona discriminador manera Donald Trump pa ta nan presidente.
A haci e pregunta tocante si nan persona manera Mericano biba den exterior por vota y varios a comenta cu nan a haci uso di nan derecho door di pidi un ‘absentee ballot’. Cu e ‘absentee ballot’ aki, por deposita nan voto pa medio di corespondencia.
Un comentario cu tambe a resalta di un persona cu a traha di serca den politica Mericano, ta cu e ta premira cu si Clinton gana lo por tin efectonan negativo directo pa Aruba. Locual cu ta conduci’e na e pensamento aki ta, e declaracionan di Clinton cu lo hisa diferente belasting pa cual lo haci cu menos persona lo disidi di viaha pa bini entre otro Aruba.
Bon Dia Aruba lo ta sigiendo e eleccion na Merca awe di serca y lo sigui mantene bo informa.
