Arubianonan cu a biaha den exterior recientemente a keda confronta cu e situacion cu na regreso, mester yena un ED-card mientras cu ta residente legal di nos isla. Esaki a genera malcontento den comunidad, cu a expresa esaki riba rednan social.

Tabata na october di aña pasa cu Inmigracion Aruba (IA) a anuncia cu entrante 30 di october 2024, tur bishitante na Aruba lo por ricibi un cualificado (anteriormente yama “ok to board” cu e marcado berde) riba e plataforma nobo ED-Card di Aruba, https://edcardaruba.aw/.

Segun IA, cambionan notabel ta e apariencia general di e plataforma y e cualificado. “E biahero por yena esaki un siman prome cu nan biahe pa Aruba. Esaki ta aplicabel pa entrada na aeropuerto y puertonan maritimo. E plataforma nobo di ED-Card di Aruba ta un esfuerso pa acelera y standarisa e proceso na yegada, manera un documentacion necesario cu mester wordo yena prome cu yegada.”

Exigencia pa local

Loke a genera controversia na Aruba tabata e exigencia pa residentenan di nos isla tambe yena e ED-card digital na momento di drenta Aruba. Asina varios ciudadano a haya instruccion cu mester yena e ED-card online prome cu drenta Aruba, y si no haci esaki, un miembro di inmigracion na aeropuerto ta yena esaki pa e ciudadano.

Segun e website oficial, edcardaruba.aw, e carchi di Embarcacion/Desembarcacion (ED) online ta un formulario di pre-registracion rekeri pa drenta Aruba. Segun politica di inmigracion di e pais, tur pasahero di yegada, incluyendo residente, mester a completa e ED-card online aki. E ta un rekisito esencial cu por completa “rapido y facilmente online.” Mester simplemente yena e detayenan y lo ricibi e documento via e-mail.

Loke ta rekeri ta un paspoort valido, detayenan personal, informacion di contacto y informacion di biahe.
E website ta nota cu e ED-card online no ta un visa, y cu yena esaki no ta garantisa entrada na Aruba.

Medida sin base
 Sinembargo, tin duda riba e base legal di e medida aki, basa riba uitspraak di un caso bayendo back na 1993.

Manera Bon Dia Aruba a yega di publica, na 1993 tabatin e caso di Sr. Hubert Lopez.

Sr. Hubert Lopez y Sra. Martina Lopez-Winklaar a entama un caso pa motibo di no kier pa pone un stempel den nan paspoort y no kier a yena un ED-card. Ya e tempo aya, abogado di pareha Lopez, mr. Flanders a mustra cu e practica aki no tin base den ley. E carchi di Embarcacion y Desembarcacion tin su base legal den e ley di Admision y Expulsion, LTU.

Sinembargo, ta considera cu LTU no ta un base legal aplicable pa ciudadanonan local, ya cu LTU ta pa trafico di stranhero.

Asina dia 6 di mei 1993, Sr. Lopez y su esposa Martina Lopez-Winklaar a entrega un proceso den Kortgeding contra e medida aki. Den nan documento legal, a mustra cu nan ta exento for di LTU, pa loke e ordennan ehecutivo di LTU – cu ta referi unicamente na trafico di stranhero – no ta aplica pa nan. Y mirando cu no tin otro disposicion legal, ta mustra cu e demandantenan no tin obligacion pa identifica cu paspoort ni pa completa un carchi di Embarcacion y Desembarcacion (ED-card) na momento di salida of yegada na Aruba, segun stipula den articulo 15A, paragraf 2 di Ordenansa di Admision (P.B. 1985, no.57.)

E datonan rekeri den e ED-card ta indica claramente cu ta referi na trafico di stranhero y no residentenan di Aruba, cu no ta bao hurisdiccion di LTU.

Ademas, a argumenta cu hasta si un residente cay bao hurisdiccion di LTU, ni e ordenansa aki, ni decision ni decretonan ministerial basa riba esaki ta obliga agentenan di desembarque pa pone stempel riba paspoort di un biahero na su yegada y salida.

Por lo tanto, e demandantenan a solicita pa duna instruccion na agentenan di desembarcacion pa no impedi salida of yegada di e demandantenan na Aruba si nan no ta desea di identifica nan mes cu paspoort sino cu un documento di identidad emiti pa gobierno, y tampoco exigi nan pa presenta un ED-card. Esaki entre otro demandanan relaciona.

Den e vonnis ta resalta e posicion di pareha Lopez cu e exigencia pa un ED-card no tin respaldo den ley, ya cu e LTU no ta aplica na nan.

Den su evaluacion di e caso, hues H. Warnink a considera cu e LTU no ta aplica, segun articulo 1, na categorianan determina di persona, y manera ta indiscutible, e demandantenan (como residentenan di Aruba) ta pertenece na e categorianan aki. Mirando cu e ley no ta aplica na nan, e decretonan general emiti pa ehecuta e ley tampoco por impone riba nan obligacionnan vinculante. Por lo tanto, Estado no por sostene riba articulo 15a di Decreto di Admision, cu ta basa riba articulo 18 di LTU. E disposicion di articulo 15a, cu ta obliga e capitan di un avion duna cada pasahero un carchi ED, y pa e pasahero completa y entrega esaki na funcionarionan di desembarcacion na momento di yega of sali, no ta aplica na e demandantenan.

Implicacion di e caso pa actualidad

E caso di Sr. Lopez y Sra. Lopez-Winklaar, a pesar di a tuma lugar 31 aña pasa, tin implicacion awendia. Realidad ta cu e caso aki ta mustra cu e exigencia pa ciudadanonan di Aruba yena un ED-card na momento di drenta Aruba, no tin sosten legal y cu gobierno – y su funcionarionan di inmigracion – no por exigi pa ciudadanonan di Aruba yena un ED-card.

Cobransa pa studiantenan Arubiano
 Otro aspecto controversial ta cu Arubianonan studiando den exterior, na momento cu kier bin vakantie na Aruba, ta haya cu mester yena e ED-card y paga e $20 di Sustainability Fee pa por drenta nan pais, a pesar cu ta ricibi un reembolso pa esaki despues.

Den un post riba Facebook luna pasa, un usuario a adverti studiantenan riba e hecho aki:

“Atencion studiante Arubiano den exterior:

Si bo ta biniendo Aruba, bo MESTER paga e $20 di Sustainability Fee pa haya bo ED Card.

Despues bo ta manda un email pa info@awss.aw cu comprobante cu bo ta un studiante, bo ED Card number y bo paspoort pa bo haya un REFUND

Esaki ta keda por lo pronto asina, te ora cu AWSS cambia e sistema di online payment di e ED card pa uno cu ta haci distincion entre bishitante y Arubiano.”

“Glitches”

Den esaki, otro usuarionan a expresa diferente inconveniente cu nan a experimenta na momento cu tin fayo of cosnan straño riba e website. Por ehemplo, cu tin biaha ta haci e cobransa di $20 na persona cu ta indica cu ta residente di Aruba tambe, y e situacion a bira confuso y fastioso.

Otro ciudadano a expresa cu el a bay yena e ED-card y e pantaya a bisa cu no ta haya e persona aki den Censo, y den su comentarionan, otronan a bisa cu nan tambe a pasa den e mesun situacion. Na final, hopi di nan a djis keda sin yena e ED-card online y laga e agente di Inmigracion na Aruba deal cu e situacion.

Y no ta djis residente, sino algun turista tambe a expresa confusion y contratempo cu e website. Tin algun hende cu no a haya cobransa di $20 pa e Sustainability Fee, mientras otronan si ta haya cobransa y e website ta pidi detaye di nan credit card.