Habitantenan di bario Seroe Lopes a entrega nan keho ayera na Ministerio Publico relaciona cu e dump ilegal na Tamarijn. Esaki despues di algun dia cu e dump tabata na candela atrobe, causando molester den e bario.
Habitante Luc Alofs ta declara na Bon Dia Aruba cu nan a pidi simplemente pa Ministerio Publico bay over na ‘strafrechtelijke vervolging di exploitant doño di e tereno. “Exactamente manera nos a declara den conferencia di prensa. Nos a referi na ‘Hinderwet’, Algemene Politie Verordening y Wetboek van Strafrecht. Nos ta spera cu OM ta mira un base legal pa persecucion cual esey ta pa nan dicidi,” sr. Alofs ta bisa nos redaccion.
Dump na candela atrobe
E siman aki e habitantenan di e bario afecta a organisa un rueda di prensa pa pidi gobierno actua contra e dump priva na tamarijn cu a causa hopi molester den luna di april. E tereno causando molester ta un zandafgaving cu a wordo uza como dump ilegal pa hopi tempo caba segun sr. Alofs. Esaki a core cu basta habitante for di e area cu no por a keda drumi na nan cas pa algun dia. “Instancianan ta purba yega na un solucion y no ta logra. No na un manera suficiente lihe y nos ta den peliger. Nos ta pidi minister Dowers pa mustra su boluntad, haci esaki un reto personal pa su mes y bin cu un solucion,” sr. Alofs ta comenta.
“Lamentablemente nos mester a bay prensa, acerca polis varios biaha na aña 2001, 2010 y 2012 a organisa un protesta anto colecta varios firma di nos bario. Na 2012 door di tur cos cu a sosode den nos bario, politica a bira activo, gobierno a formula un maneho pa controla henter e problema di dumpmento ilegal na Aruba(maneho Cero Tolerancia). Pero despues di un par di aña bo ta ripara cu sinembargo e problema no a stop,” sr. Alofs ta finalisa bisando.
