Riba 7 di november un total di 75 ciudadano a inicia nan participacion na e curso Finanzas den mi Hogar den districto di Santa Cruz. Districto di Santa Cruz ta e ultimo districto pa ricibi e curso Finanzas den mi Hogar.
Durante transcurso di e aña Finanzas den mi Hogar a bishita tur e diferente districtonan na Aruba. E curso na Santa Cruz lo clausura un aña sumamente exitoso di educacion financiero.
Ta importante pa nos ta consciente riba nos entrada y gasto y con esaki ta afecta nos stabilidad y metanan financiero. E curso ta enfoca pa nos bira critico riba nos decisionnan financiero y tambe riba nos actitud cu por afecta sin cu nos sa, e cartera. Un consumidor consciente y critico ta e fundeshi di un economia inclusivo y duradero. E habilidad di un persona pa maneha su entrada y gastonan ta un habilidad necesario, cu ta yuda evita problemanan financiero manera debe (of gastonan) innecesario.
Finansas den mi Hogar a wordo organisa y financia door di Ministerio di Asuntonan Economico y desaroya y presenta door di Fundacion Plan di Bida. A zorg pa por trece esaki mas cerca posibel na ciudadanonan interesa, y a haci esaki completamente gratis pa asina elimina cualkier barera of incertidumbre di participacion.
“Ta importante pa haci’e facil pa nos ciudadanonan por yega y participa na e curso di Finansas den mi Hogar. P’esey e meta tabata pa ofrece e curso Finanzas den mi Hogar gratis y den tur districto, mas cerca di nos ciudadanonan”, segun minister Geoffrey Wever.
Den e aña binidero lo sigui enfoca riba diferente temanan di educacion financiero, continuando cu maneho di eleva e conocemento di nos ciudadanonan den aspectonan comercial y financiero. Minister Geoffrey Wever ta gradici Sra. Paloma Osorio di fundacion Plan di Bida pa su esfuersonan durante aña.
